Bear: విమానంలో తప్పించుకున్న ఎలుగుబంటి.. చివరకు ఏమైందంటే..!

ఇంటర్నెట్‌ డెస్క్‌: ఓ ఎలుగుబంటిని విమానంలో తరలిస్తుండగా.. అది కాస్త పెట్టెలోంచి తప్పించుకుని (Escaped Bear) చక్కర్లు కొట్టిన ఘటన కలకలం రేపింది. ఇరాక్‌ రాజధాని బాగ్దాద్‌ నుంచి దుబాయి చేరుకున్న ఓ విమానం (Iraqi Airways) కార్గో విభాగంలో ఇది వెలుగుచూసింది. ఫలితంగా ఆ ఫ్లైట్‌ తిరుగు ప్రయాణం ఆలస్యమైంది.

ఇరాకీ ఎయిర్‌వేస్‌కు చెందిన విమానంలో ఇటీవల ఓ ఎలుగుబంటిని బాగ్దాద్‌ నుంచి దుబాయికి తరలించే ఏర్పాట్లు చేశారు. ఈ క్రమంలోనే దానిని ప్రత్యేక పెట్టెలో పెట్టి, విమానం కార్గోలోకి ఎక్కించారు. అయితే, విమానం దుబాయికి చేరుకున్న సమయంలో.. ఆ భల్లూకం పెట్టెలోంచి తప్పించుకుని, అక్కడే తిరుగుతున్నట్లు కార్గో సిబ్బంది గుర్తించారు. కొంతమంది దానిని నిమురుతున్నట్లు కనిపిస్తోన్న వీడియోలు నెట్టింట వైరల్‌గా మారాయి.

రెండు ప్రపంచ యుద్ధం నాటి బాంబు కలకలం.. సురక్షిత ప్రాంతాలకు వేలమంది!

కొద్దిసేపటికి ఓ ప్రత్యేక బృందం విమానాశ్రయానికి చేరుకుని, దానికి మత్తుమందు ఇచ్చి విమానం నుంచి కిందికి దించడంతో.. కథ సుఖాంతమైంది. ఈ క్రమంలోనే విమానం తిరుగు ప్రయాణం ఆలస్యం కావడంతో.. ప్రయాణికులకు ఆ విమానయాన సంస్థ క్షమాపణలు చెప్పింది. అంతర్జాతీయ జంతు సంక్షేమ మార్గదర్శకాలను పాటిస్తూనే ఆ ఎలుగును రవాణా చేసినట్లు తెలిపింది. అయితే, దాన్ని ఎందుకు తరలించారో తెలియరాలేదు.

మరోవైపు.. ఇరాక్‌ ప్రభుత్వం కూడా ఈ వ్యవహారంపై స్పందించింది. ఈ ఘటనపై విచారణకు ఆదేశించినట్లు తెలిపింది. రెండు చిన్న ఎలుగుబంట్లను రవాణా చేశామని.. ఆ సమయంలో రెండోది కూడా అక్కడే ఉన్నట్లు వెల్లడించడం కొసమెరుపు.