మా బెలూన్‌ కూల్చివేత విచక్షణారహితం

అమెరికా చర్యపై చైనా మండిపాటు

బీజింగ్‌: తమ దేశానికి చెందిన వాతావరణ పరిశోధన బెలూన్‌ను అమెరికా కూల్చివేయడంపై చైనా సోమవారం మరోసారి ఆగ్రహం వ్యక్తం చేసింది. అమెరికా సైన్యం యుద్ధ విమానాలను ఉపయోగించి అనుమానాస్పద బెలూన్‌ను నిఘా బెలూన్‌గా భావిస్తూ శనివారం కూల్చివేసిన సంగతి తెలిసిందే. ఈ చర్య విచక్షణారహితమైనదని చైనా అభివర్ణించింది. ఈ పరిణామం చైనా-అమెరికాల మధ్య నెలకొన్న అంతరాలను తొలగించేందుకు జరుగుతున్న ప్రయత్నాలను, పురోగతిని ప్రభావితం చేయడంతోపాటు దెబ్బతీసిందని పేర్కొంది. ఈ సంఘటనపై అమెరికా రాయబార కార్యాలయానికి ఆదివారం ఫిర్యాదు చేసినట్లు చైనా ఉప విదేశీ వ్యవహారాల మంత్రి షీ ఫెంగ్‌ వెల్లడించారు. అమెరికా భూ భాగాన్ని విడిచి వెళ్లిపోతున్న వాతావరణ పరిశోధనలకు ప్రయోగించిన పౌర బెలూన్‌ను అంతర్జాతీయ న్యాయ సూత్రాల స్ఫూర్తిని మరిచి కూల్చివేయడం అతిగా స్పందించడమేనని పేర్కొన్నారు.

ఆ బెలూనూ మాదే.. లాటిన్‌ అమెరికా గగనతలంలో గుర్తించిన భారీ బెలూన్‌ తమ దేశానికి చెందినదేనని చైనా సోమవారం ప్రకటించింది.