హైజాక్‌ అయిన నౌక భారత్‌కు వస్తున్నదే

పణజీ: ఇరాన్‌ శనివారం హైజాక్‌ చేసిన ఎంఎస్‌సీ ఏరీస్‌ నౌక భారత్‌కు వస్తున్నదేనని నౌకాదళాధిపతి అడ్మిరల్‌ ఆర్‌ హరి కుమార్‌ తెలిపారు. అది మన దేశంలోని ఒక తీరానికి చేరాల్సి ఉందని చెప్పారు. గోవాలోని వాస్కోలో ఐఎన్‌ఎస్‌ హంసపై ఆదివారం ఆయన మీడియాతో మాట్లాడారు. దీనిపై ఇప్పటివరకూ ఎటువంటి తాజా సమాచారం లేదని తెలిపారు. ఇజ్రాయెలీ కుబేరుడికి చెందిన విదేశీ జెండాతో ఉన్న ఈ నౌకలో 17 మంది భారతీయ సిబ్బంది ఉన్న సంగతి తెలిసిందే.

ఇరాన్‌ విదేశాంగ మంత్రితో జైశంకర్‌ చర్చలు

ఎంఎస్‌సీ ఏరీస్‌ నౌకలోని 17 మంది భారతీయ సిబ్బంది కోసం ఇరాన్‌ విదేశాంగశాఖ మంత్రి హొస్సేన్‌ అమీర్‌ అబ్దుల్లాహియాన్‌తో మన విదేశాంగ మంత్రి జైశంకర్‌ ఆదివారం మాట్లాడారు. వారిని విడుదల చేయాలని కోరారు. పశ్చిమాసియాలో ఘర్షణలను నివారించాలని, దౌత్య మార్గాల్లో పరిష్కారం చూడాలని ఆయన సూచించారు.