Donald Trump: ‘లీకులు అందాయి.. నన్ను అరెస్టు చేస్తారు!’

వాషింగ్టన్‌: తమతో శారీరక సంబంధాలు నెరిపాడని ఆరోపించిన ఇద్దరు మహిళల నోరు మూయించేందుకుగానూ అమెరికా(America) మాజీ అధ్యక్షుడు డొనాల్డ్‌ ట్రంప్‌(Donald Trump) డబ్బు ముట్టజెప్పాడని ఆరోపణలు వచ్చిన విషయం తెలిసిందే. ఈ కేసులో విచారణ చేపడుతోన్న మాన్‌హాటన్ డిస్టిక్ అటార్నీ(Manhattan District Attorney) తనపై అభియోగాలు మోపేందుకు సిద్ధమవుతున్నారని.. ఈ క్రమంలో మంగళవారం తనను అరెస్టు చేసే అవకాశం ఉందంటూ ట్రంప్‌ తెలిపారు. తన సామాజిక మాధ్యమం ‘ట్రూత్‌ సోషల్‌(Truth Social)’లో ఈ మేరకు పోస్ట్‌ పెట్టారు.

‘అధ్యక్ష అభ్యర్థిత్వ రేసులో ముందంజలో ఉన్న రిపబ్లికన్‌ నేత, అమెరికా మాజీ అధ్యక్షుడిని మంగళవారం అరెస్టు చేయనున్నారు. మాన్‌హాటన్ డిస్టిక్ అటార్నీ కార్యాలయం నుంచి ఈ మేరకు లీకులు అందాయి’ అని ట్రంప్‌ పేర్కొన్నారు. ఈ క్రమంలోనే ‘నిరసనలు చేపట్టండి. దేశాన్ని కాపాడండి!’ అని తన మద్దతుదారులకు పిలుపునివ్వడం గమనార్హం. 2021 జనవరిలో అమెరికా క్యాపిటల్‌ హిల్‌ వద్ద అల్లర్లకు ముందు సైతం ట్రంప్‌ ఇదే తరహా వ్యాఖ్యలు చేశారు. ఈ పరిణామాల నేపథ్యంలో న్యూయార్క్‌ పోలీసులు అప్రమత్తమయ్యారు. ఈ మేరకు భద్రతా ఏర్పాట్లు చేస్తున్నారు.

ఇదిలా ఉండగా.. ఈ కేసులో ట్రంప్ మాజీ న్యాయవాది మైఖేల్ కోహెన్‌తో సహా పలువురు సాక్షులను అటార్నీ కార్యాలయం విచారించింది. ట్రంప్‌ ఆదేశాల మేరకు 2016లో ఇద్దరు మహిళలకు 2.80 లక్షల డాలర్ల చెల్లింపులు చేసినట్లు కోహెన్‌ చెప్పాడు. 2016 అధ్యక్ష ఎన్నికల సమయంలో ట్రంప్ ఆ విషయాలను బయటకు పొక్కనీయకుండా డబ్బుతో ఒప్పందం చేసుకున్నారని తెలిపాడు. అయితే, ట్రంప్ ఈ ఆరోపణలను ఖండించారు. తాను ఏ తప్పూ చేయలేదని, తన 2024 అధ్యక్ష అభ్యర్థిత్వ ప్రచారాన్ని నీరుగార్చేందుకు ‘డెమొక్రాటిక్’ ప్రాసిక్యూటర్ ద్వారా తప్పుడు విచారణ చేయిస్తోందని ఆరోపించారు.