Kabul attack: కాబుల్‌ విమానాశ్రయ పేలుళ్ల నిందితుడిపై ₹75 కోట్ల రివార్డు

ప్రకటించిన అమెరికా

వాషింగ్టన్‌: అఫ్గానిస్థాన్ రాజధాని కాబుల్ అంతర్జాతీయ విమానాశ్రయంలో గతేడాది బాంబు పేలుళ్లకు కారణమైన ఐఎస్ఐఎస్‌-ఖొరాసన్‌ నేత ఆచూకీ తెలిపిన వారికి అమెరికా భారీ నజరానా ప్రకటించింది. ఈ దాడిలో ప్రధాన సూత్రధారి అయిన సనావుల్లా గఫారీ ఆచూకీ తెలిపిన వారికి 10 మిలియన్ డాలర్లు (సుమారు రూ.75 కోట్లు) ఇస్తామని అమెరికా రివార్డ్​ ఫర్​ జస్టిస్ (ఆర్​ఎఫ్‌జే) విభాగం తెలిపింది. వాట్సాప్, టెలిగ్రామ్ తదితర సామాజిక మాధ్యమాల ద్వారా సమాచారాన్ని తెలియజేయవచ్చని రివార్డ్ ఫర్ జస్టిస్​ ఓ ట్వీట్​ చేసింది. ఆ ట్వీట్‌కు గఫారీ ఫొటోను కూడా జతచేసింది. అతడిని న్యాయస్థానం ముందు నిలబెట్టేందుకు సహకరించండి అంటూ పేర్కొంది.

అఫ్గాన్​లో 20 ఏళ్ల పోరాటానికి గతేడాది ముగింపు పలికిన అమెరికా.. తమ మొత్తం బలగాలను స్వదేశానికి తరలించిన విషయం తెలిసిందే. ఇదిలా ఉంటే.. గత ఆగస్టు 26న కాబుల్ అంతర్జాతీయ విమానాశ్రయంపై ఉగ్రదాడి జరిగింది. ఈ ఘటనలో మొత్తంగా 185 మంది ప్రాణాలు కోల్పోయారు. మరో 150 మంది పౌరులు గాయపడ్డారు. అందులో 18 మంది అమెరికా సిబ్బంది ఉన్నారు. 1994లో అఫ్గాన్‌లో జన్మించిన గఫారీ ప్రస్తుతం ఐఎస్​ఐఎస్​-కె ఉగ్రవాద సంస్థకి నాయకుడిగా వ్యవహరిస్తున్నాడు. కాబుల్‌ పేలుళ్లకు తామే కారణమంటూ గతంలోనే ఈ సంస్థ ప్రకటించింది. ప్రస్తుతం అఫ్గానిస్థాన్​లో జరుపుతున్న ఉగ్ర కార్యక్రమాలకు ఈ సంస్థ నిధులు సమకూర్చుతున్నట్లు ఆర్​ఎఫ్‌జే తెలిపింది.