Kidnap: అన్న ఉండేలు దెబ్బతో.. చెల్లికి విముక్తి!

ఇంటర్నెట్‌డెస్క్‌: ఎనిమిదేళ్ల తన చెల్లిని ఓ దుండగుడు కిడ్నాప్‌ (kidnap) చేసేందుకు ప్రయత్నించాడు. కిటికీలోంచి అది చూసిన 13 ఏళ్ల బాలుడు ఎంతో తెలివిగా వ్యవహరించి చెల్లిని దుండగుడి చెర నుంచి కాపాడాడు. తన వద్దనున్న ఉండేలు (క్యాట్రీబాల్‌)తో కిడ్నాపర్‌ తల, చాతీపై గురిపెట్టి కొట్టాడు. దీంతో విలవిల్లాడిన అతడు.. చిన్నారిని అక్కడే వదిలేసి పారిపోయాడు. అమెరికాలోని మిషిగాన్‌లో బుధవారం జరిగిన ఈ ఘటన ఆలస్యంగా వెలుగులోకి వచ్చింది.

 పోలీసులు వెల్లడించిన వివరాల ప్రకారం.. అల్‌పేనా టౌన్‌షిప్‌లో ఓ కుటుంబం నివసిస్తోంది. తల్లిదండ్రులు బయటకి వెళ్లడంతో ఆ ఇంట్లో ఇద్దరు పిల్లలు మాత్రమే ఉన్నారు. పుట్టగొడుగుల కోసం 8 ఏళ్ల చిన్నారి ఇంటి పెరట్లోకి రావడం గమనించిన ఓ దుండగుడు.. నక్కి నక్కి వచ్చి.. ఆమె నోటిని మూసేసి, అక్కడి నుంచి దగ్గర్లోని పొదల్లోకి లాక్కెళ్లిపోయాడు. విడిపించుకునేందుకు ఆమె ఎంత ప్రయత్నం చేసినా ఫలితం లేకపోయింది. ఇదంతా బెడ్‌రూమ్‌ కిటికీలోంచి చూసిన ఆమె సోదరుడు మెరుపు వేగంతో స్పందించాడు. తన వద్దనున్న ఉండేలుతో దుండగుడి తల, ఛాతీపై గురిపెట్టి కొట్టాడు. అతడు బాధతో విలవిల్లాడుతుండగా.. ఈ లోగా చిన్నారి తప్పించుకొని ఇంట్లోకి వచ్చేసింది.

నిందితుడు అక్కడి నుంచి పారిపోయి దగ్గర్లోని ఓ గ్యాస్‌ స్టేషన్‌లో దాక్కున్నాడు. సమాచారం అందుకున్న పోలీసులు గాలించి ఆతడిని అదుపులోకి తీసుకొని కోర్టులో హాజరుపరిచారు. ఓ అంతర్జాతీయ వార్తా పత్రిక వెల్లడించిన వివరాల ప్రకారం.. నిందితుడు అదే టౌన్‌షిప్‌కు చెందిన 17 ఏళ్ల టీనేజర్‌గా తెలుస్తోంది. విచారణ చేపట్టిన న్యాయస్థానం అతడికి 1,50,000 డాలర్ల జరిమానా విధించింది.