పిల్లల కోసం సైన్స్‌ పార్కు!

హలో ఫ్రెండ్స్‌.. మనలో చాలామందికి లెక్కలంటే భయం.. కొందరికేమో సైన్స్‌ పాఠాలు అర్థం కాక, పుస్తకాలతో కుస్తీలు పడుతుంటారు. అందుకే పిల్లల్లో సైన్స్‌ పట్ల భయం పోగొట్టి, అందులోని అంశాలు సులభంగా అర్థమయ్యేలా ఓ పార్కును ఏర్పాటు చేశారు. మరి ఆ పార్కేంటో, ఆ వివరాలేంటో తెలుసుకుందామా..!

కర్ణాటక రాష్ట్రం గదగ్‌ పట్టణంలోని చిక్కట్టి అనే ఓ ప్రైవేటు పాఠశాలకు విద్యార్థులందరూ వరస కడుతున్నారట. అలాగని అడ్మిషన్ల కోసమని పొరపాటు పడకండి. ఎందుకూ అంటే.. ఆ బడి ఆవరణలో ఇటీవల కొత్తగా నిర్మించిన సైన్స్‌ పార్కే అందుకు కారణం.

31 నమూనాలు..

సదరు ప్రైవేటు పాఠశాల యజమాని చిక్కట్టి.. బడి ఆవరణలోని దాదాపు ఎకరం స్థలంలో సైన్స్‌ పార్కును తీర్చిదిద్దారు. దీనికోసం దాదాపు రూ.30 లక్షలు ఖర్చు చేశారట. ఈ పార్కులో మన పాఠ్య పుస్తకాల్లో ఉండే దాదాపు 31 నమూనాలను అందుబాటులో ఉంచారు. విద్యార్థులు కేవలం తరగతి గదుల్లో పాఠాలు వినడమే కాకుండా.. ప్రయోగాత్మకంగా నేర్చుకుంటే ఎక్కువ కాలం గుర్తుంటుందని భావించారాయన. దాంతో సొంత డబ్బుతో ఈ పార్కును ఏర్పాటు చేయించారు. అంతేకాదు.. ప్రభుత్వ, ఇతర ప్రైవేటు పాఠశాలల విద్యార్థులకు ఉచితంగానే అందులోకి ప్రవేశం కల్పిస్తున్నారు.

వీడియోల ద్వారా..

స్థానికంగా, చుట్టుపక్కలున్న విద్యార్థులు మాత్రమే ఆ పార్కుకు వెళ్లిరాగలరు. ‘మరి ఇతర ప్రాంతాల్లో ఉండేవారి పరిస్థితి ఏంటి?’.. ఇదే ప్రశ్న.. పార్కు నిర్వాహకులకూ వచ్చింది. అందుకే, అందులో ఉన్న ప్రాజెక్టులు, పరికరాల పనితీరును వీడియో తీసి మరీ.. స్కూల్‌కు సంబంధించిన సామాజిక మాధ్యమాల్లో పెడుతున్నారు. ఈ పార్కును 2019లోనే అందుబాటులోకి తీసుకురావాలని అనుకున్నా.. కొవిడ్‌ లాక్‌డౌన్‌తో కొంత ఆలస్యమైందట. తమ ప్రాంతం పిల్లలు సైన్స్‌లో వెనకబడొద్దనే ఉద్దేశంతోనే ఆయన ఈ ఆలోచన చేశారట. ఆ స్కూల్‌ టీచర్లే పార్కుకు వచ్చే విద్యార్థులకు ఆయా పరికరాల గురించి వివరంగా చెబుతున్నారు. పుస్తకాల్లో చదువుకున్న అంశాలను నేరుగా చూస్తుంటే చాలా ఆశ్చర్యంగా ఉందంటూ అక్కడికొచ్చే పిల్లలంతా సంతోషంగా చెబుతున్నారు. నేస్తాలూ.. మీరెప్పుడైనా ఆ కర్ణాటక వైపు వెళ్తే, ఈ సైన్స్‌ పార్కును చూసిరావడం మర్చిపోవద్దు మరి..!