రూ.45 లక్షలలోపు ఇళ్లకే డిమాండ్‌

ఈనాడు, హైదరాబాద్‌: కొవిడ్‌ సంక్షోభంలోనూ అందుబాటు ఇళ్ల గిరాకీ తగ్గలేదు. రూ.45 లక్షలలోపు ఇళ్లను అందుబాటు ఇళ్లుగా పరిగణనలోకి తీసుకుంటే ఈ ఏడాది తొలి త్రైమాసికంలో మొత్తం ఇళ్ల విక్రయాల్లో వీటి వాటానే 45 శాతంగా ఉంది. హైదరాబాద్‌తో సహా దేశంలో 8 ప్రధాన నగరాల్లో ఇదే ప్రతిబింబించిందని ప్రాప్‌టైగర్‌ తాజా త్రైమాసిక సర్వేలో వెల్లడించింది. ధరల్లో 1-3 శాతం పెరిగాయని తెలిపింది.
* 8 నగరాల్లో జనవరి-మార్చి విక్రయాలు క్రితం ఏడాది విక్రయాలకు చేరువగా ఉన్నాయి. 5 శాతం విక్రయాలు తక్కువగా నమోదయ్యాయి.  
* దిల్లీ, కోల్‌కతా, చెన్నై, హైదరాబాద్‌, అహ్మదాబాద్‌లలో విక్రయాలు పెరగ్గా ముంబయి, పుణే, బెంగళూరులో తగ్గాయి.
* రూ.45లక్షల ధరల లోపున్న 2 పడకల ఫ్లాట్ల విక్రయాలు 45శాతంగా ఉన్నాయి. రూ.45 లక్షలు-రూ.75 లక్షల మధ్యలో ఇళ్ల విక్రయాల వాటా 26శాతంగా ఉండగా రూ.75లక్షలు-రూ.కోటి ఇళ్లవాటా 10శాతం, రూ.కోటిపైన ప్రీమియం ఇళ్లవాటా 19 శాతంగా ఉంది.
* హైదరాబాద్‌ రియల్‌ ఎస్టేట్‌ మార్కెట్‌ మిగతా నగరాలకు భిన్నంగా దూసుకెళ్తోంది. ఈ ఏడాది మొదటి త్రైమాసికంలో 5శాతం వృద్ధి నమోదైంది.