పాస్తా మసాలా టేస్టీగా ఉండాలంటే..

మా ఇంట్లో అందరికీ పాస్తా మసాలా అంటే చాలా ఇష్టం. కానీ నేను చేసింది నచ్చడం లేదు. హోటల్‌ స్టైల్లో చేయాలంటే ఎలాంటి జాగ్రత్తలు పాటించాలో కాస్త చెప్పండి!

• ముందుగా పాస్తాను ఉడికించాలి. అందులో చెంచాడు నూనె వేస్తే.. అతుక్కోకుండా ఉంటాయి.
• ఇందుకోసం మార్కెట్లో దొరికే ఏ రకం పాస్తానైనా వాడుకోవచ్చు.
• మాక్రోనీ తీసుకుంటే 80% మాత్రమే ఉడికించి చల్లార్చుకోండి. మిగిలిన 20% మసాలాతో పాటు ఉడుకుతుంది.
• కాప్సికం, స్వీట్‌ కార్న్‌, మష్రూమ్స్‌.. ఇలా మీకు నచ్చిన ఏ రంగు కూరగాయలైనా వాడుకోవచ్చు. పనీర్‌ కూడా వేసుకోవచ్చు. తాజాగా ఉన్న పచ్చి బఠాణీలు వాడేట్లయితే ఉల్లిపాయ మగ్గాక వేయాలి.
• సాస్‌లు లేకుండా రుచిగా చేసుకోవచ్చు. టొమాటోలు వాడితే గనుక.. టొమాటో సాస్‌ వేయనవసరం లేదు.
• టొమాటోలు అందుబాటులో లేకుంటే టొమాటో కెచప్‌, పిజ్జా సాస్‌, చిల్లీ ఫ్లేక్స్‌ ఉపయోగించవచ్చు.
• పాస్తా రుచి పెంచేది చీజ్‌. కనుక మొత్తం ఉడికిందనుకున్నాక.. చీజ్‌ తురుము వేయాలి.
• పాస్తాను దించే ముందు కొద్దిగా నిమ్మరసం, కాస్త కొత్తిమీర తరుగు వేస్తే సరిపోతుంది. పాస్తా చల్లబడితే రుచి తగ్గిపోతుంది. అందుకే వేడిగా ఉన్నప్పుడే వడ్డించుకుని తినాలి.

పవన్‌ సిరిగిరి, చెఫ్‌, హైదరాబాద్‌