కూతురి సమాధిపైన క్యూఆర్‌ కోడ్‌!

రెజీ మినీలకి ఒక్కతే కూతురు. పేరు అఖిల. ఉత్సాహమే ఊపిరిగా ఉండేది. ఆటాపాటలతో అలరించేది. అలాంటమ్మాయికి 2022 డిసెంబర్‌లో తీవ్ర జ్వరం వచ్చింది. చూస్తుండగానే అది ఆ అమ్మాయి ప్రాణం తీసింది. కూతురిని కళ్ళెదుటే మృత్యువు కబళించడాన్ని చూసి కుప్పకూలిపోయిన ఆ తల్లిదండ్రుల్ని- అఖిల స్నేహితులే ఓదార్చారు. సోషల్‌ మీడియాలో అఖిల పేల్చిన జోకులూ, సరదా వీడియోలూ, విజయాలనీ ఆ తల్లిదండ్రులతో పంచుకునేవాళ్ళు. వీళ్ళేమో అఖిల చిన్ననాటి ముచ్చట్లూ, ఫొటోలని వీళ్ళకి చూపిస్తుండేవారు. అప్పుడే ఆ అమ్మాయికి సంబంధించిన జ్ఞాపకాలన్నింటితో ఓ వెబ్‌సైట్‌ సృష్టించారు ఆ తల్లిదండ్రులు. దానికి ఓ క్యూఆర్‌ కోడ్‌ని సృష్టించి- అఖిల సమాధిపైన దాన్ని ఉంచాలనుకున్నారు. కేరళ కొల్లంలోని వలియాపల్లి అనే గ్రామంలో ఉంటారీ దంపతులు. అక్కడి సిరియన్‌ కేథలిక్‌ చర్చి ఆచారం ప్రకారం సమాధిపైన పేరు జననమరణ వివరాలు తప్ప ఇంకేమీ రాయకూడదు. కానీ ఈ తల్లిదండ్రుల దైన్యం చూసి- కేరళలోనే తొలిసారి అందుకు అనుమతినిచ్చారు. దాంతో ఇటీవలే అఖిల సమాధిపైన ‘క్యూఆర్‌ కోడ్‌’ని ఉంచారు!