గరుడ వాహనంపై ఊరేగిన శ్రీవారు

తరించిన భక్త జనం

ఈనాడు, తిరుపతి: శ్రీవారి సాలకట్ల బ్రహ్మోత్సవాల్లో భాగంగా అయిదో రోజు శుక్రవారం రాత్రి శ్రీమలయప్పస్వామి గరుడ వాహనంపై భక్తులకు దర్శనమిచ్చారు. రాత్రి ఏడు గంటలకు వాహన మండపం నుంచి ప్రారంభమైన వాహన సేవ   అర్ధరాత్రి వరకు సాగింది.  బ్రహ్మోత్సవాల్లో అత్యంత విశిష్టమైన గరుడ వాహన సేవను దర్శించుకునేందుకు భారీ ఎత్తున భక్తులు తిరుమలకు తరలివచ్చారు. మాడ వీధులన్నీ గోవింద నామ స్మరణతో మార్మోగాయి. ఉదయం శ్రీమలయప్పస్వామి మోహినీ రూపంలో దర్శనమిచ్చారు. మరో తిరుచ్చిపై శ్రీకృష్ణుడిగా అలంకృతుడై భక్తులకు అభయమిచ్చారు.

ఉదయం నుంచే భక్తుల ఎదురుచూపులు

గరుడ వాహనంపై విహరించే శ్రీమలయప్పస్వామిని తిలకించేందుకు ఉదయం నుంచే భక్తులు గ్యాలరీల్లోకి వచ్చారు. అవి నిండిపోవడంతో పలువురు భక్తులు క్యూలైన్లలోనే నిలిచిపోయారు. మాడ వీధుల్లో హారతి పాయింట్ల నుంచి, ఇతర ఏర్పాట్ల ద్వారా వారు వాహన సేవను వీక్షించేందుకు తితిదే అధికారులు ఏర్పాట్లు చేశారు.