హైదరాబాద్‌ సహా 6 నగరాల్లో ఇడెల్‌ సేవలు

మహీంద్రా లాజిస్టిక్స్‌

దిల్లీ: విద్యుత్‌ వాహనాలతో సరకు సరఫరా చేసే ‘ఇడెల్‌’ సేవల్ని హైదరాబాద్‌, బెంగళూరు, దిల్లీ, ముంబయి, పుణె, కోల్‌కతాల్లో  ప్రారంభించినట్లు మహీంద్రా లాజిస్టిక్స్‌ (ఎంఎల్‌ఎల్‌) వెల్లడించింది.  రాబోయే 12 నెలల్లో ఈ సేవలు మొత్తం 14 నగరాల్లో అందించాలన్నది ప్రణాళికగా కంపెనీ తెలిపింది. ఇడెల్‌ తొలి దశలో భాగంగా సుమారు 1,000 త్రిచక్ర వాహనాలను కంపెనీ సరఫరా చేయనుంది. ‘మహీంద్రా ఎలక్ట్రిక్‌ తయారు చేస్తున్న ట్రియో జోర్‌ విద్యుత్‌ వాహనాన్ని తొలుత డెలివరీ చేయనున్నాం. ఆ తరవాత 4 చక్రాల వాహనాలను, ఇతర ఆప్షన్లను కూడా మారుమూల ప్రాంతాల వరకు చేరవేస్తామ’ని ఎంఎల్‌ఎల్‌ మేనేజింగ్‌ డైరెక్టర్‌, సీఈఓ రామ్‌ప్రవీణ్‌ స్వామినాథన్‌ వెల్లడించారు.