Tata Punch: పంచ్‌కు ఫైవ్‌స్టార్‌ రేటింగ్‌..!

ఇంటర్నెట్‌డెస్క్‌: మార్కెట్లోకి విడుదలకు ముందే టాటా పంచ్‌ కారుకు గుడ్‌న్యూస్‌ వచ్చింది. గ్లోబల్‌ ఎన్‌సీఏపీ రేటింగ్స్‌లో ఈ మైక్రో ఎస్‌యూవీకి 5స్టార్‌ రేటింగ్‌ లభించింది. కారులో పెద్దలు కూర్చొనే భాగానికి ఈ రేటింగ్‌ లభించింది. ఇటీవల కాలంలో టాటా కార్లకు తరచూ ఈ రేటింగ్‌ లభిస్తోంది. చిన్నకారుకు ఈ స్థాయి రేటింగ్‌ రావడం విశేషం.  కారును అక్టోబర్‌ 18వ తేదీన మార్కెట్లోకి తీసుకొచ్చేందుకు టాటా ప్రయత్నాలు చేస్తోంది. 20 తేదీ నుంచి విక్రయాలు మొదలుకానున్నాయి. ఇప్పటికే ఈ కారుకు సంబంధించిన బుకింగ్స్‌ స్వీకరణను ప్రారంభించింది. ఇందుకోసం రూ. 21వేలు చెల్లించాల్సి ఉంది. ఏఎల్‌ఎఫ్‌ఏ ఏఆర్‌సీ ప్లాట్‌ఫామ్‌పై కంపెనీ చెందిన ఇంపాక్ట్‌ 2.0 డిజైన్‌ను వాడి తయారు చేశారు. టాటా ప్రదర్శించిన 2020 ఆటో ఎక్స్‌పోలో ప్రదర్శించిన హెచ్‌బీఎక్స్‌ కాన్సెప్ట్‌ లైన్‌లోనే ఈ కారు ప్రొడక్షన్‌ వెర్షన్‌ ఉంది. సరికొత్త పంచ్‌ కారు బేబీ సఫారీ లుక్స్‌లో ఆకర్షణీయంగా తీర్చిదిద్దారు. 

అదిరిపోయే ఫీచర్లతో సిద్ధం..

ఈ కారుకు 16 అంగుళాల డైమండ్‌ కట్‌ అలాయ్‌ వీల్స్‌ను, డ్యూయల్‌టోన్‌ బాడీ కలర్‌, తీర్చిదిద్దిన టెయిల్‌ లైట్‌, డ్యూయల్‌ టోన్‌ బ్లాక్‌ అండ్‌ వైట్‌ క్యాబిన్‌, ఆల్ట్రోజ్‌లో వాడిన 7 ఇంచ్‌ ఇన్‌స్ట్రుమెంట్‌ క్లస్టర్‌,7.0 అంగుళాల టచ్‌స్క్రీన్‌ ఇన్ఫోటైన్‌మెంట్‌, హార్మన్‌ ట్యూన్డ్‌ మ్యూజిక్‌ సిస్టమ్‌, ఆండ్రాయిడ్‌ ఆటో, యాపిల్‌ కార్‌ప్లే, ఐఆర్‌ఏ కనెక్టెడ్‌ కార్‌ టెక్‌, స్టార్ట్‌-స్టాప్‌ బటన్‌, ఆటోమేటిక్‌ క్లైమెట్‌ కంట్రోల్‌, ఆటోఫోల్డింగ్‌ వింగ్స్‌ మిర్రర్‌, క్రూయిజ్‌ కంట్రోల్‌, కోల్డ్‌ గ్లోవ్‌ బాక్స్‌, ఆటో సెన్సింగ్‌ వైపర్స్‌, ఆటో హెడ్‌లైట్స్‌, 366 లీటర్స్‌ బూట్‌ స్పేస్‌ను ఇచ్చారు. పంచ్‌లో 1.2లీటర్‌ రెవట్రాన్‌ పెట్రోల్‌ ఇంజిన్‌ను అమర్చారు. 5స్పీడ్‌ మాన్యూవల్‌ గేర్‌ బాక్స్‌, 5స్పీడ్‌ ఆటో వెర్షన్‌ను ఆప్షనల్‌గా ఇచ్చారు.