Breaking | Feedback | ePratibha | E-PAPER | Pratibha

Musk Vs Zuckerberg: కేజ్‌ ఫైట్‌కు మస్క్‌, జుకర్‌బర్గ్‌ రెడీ.. ట్రైనింగ్‌ షురూ!

ప్రపంచ కుబేరులైన ఎలాన్‌ మస్క్, మార్క్‌ జుకర్‌బర్గ్‌ ఫైట్‌కు సిద్ధమవుతున్నారు. ఇందుకోసం శిక్షణ కూడా తీసుకుంటున్నారు. దీనిపై సోషల్‌మీడియాలో విపరీతంగా చర్చ జరుగుతోంది.

Published : 29 Jun 2023 16:40 IST

Image source: Twitter

ఇంటర్నెట్‌ డెస్క్‌: అమెరికాకు చెందిన టెక్‌ దిగ్గజాలు ఎలాన్‌ మస్క్‌ (Elon Musk), మార్క్ జుకర్‌బర్గ్‌ (Zuckerberg) పోరుకు సన్నద్ధమవుతున్నారు. అలాగని ఏ కొత్త యాప్‌ కోసమో.. కొత్త టెక్నాలజీ తీసుకురావడం కోసమో వీరి మధ్య పోటీ అనుకుంటే పొరపాటే. పరస్పరం తలపడేందుకు సిద్ధమవుతున్నారీ కుబేరులు. పరస్పరం సవాళ్లు విసురుకోవడంతో ప్రారంభమైన ఈ ప్రచారం.. ఇప్పుడు ట్రైనింగ్ సెషన్‌ వరకూ చేరడంతో దిగ్గజాల మధ్య ఫైట్‌ తథ్యమని చర్చించుకుంటున్నారు.

జుకర్‌బర్గ్ రెడీ అంటే అతడితో తాను కేజ్‌ ఫైట్‌కు (cage fight) తాను సిద్ధం అంటూ తొలుత మస్క్‌ (Elon Musk) ట్విటర్‌లో పేర్కొన్నాడు. దీనిపై జుకర్‌బర్గ్‌ (Zuckerberg) స్పందిస్తూ ‘ప్లేస్‌ ఎక్కడో చెప్పు’ అంటూ బాలయ్య స్టయిల్‌లో సవాల్‌కు సై అన్నాడు. ‘వెగాస్‌ ఆక్టాగాన్’.. రా చూసుకుందాం’ అంటూ అదే స్టయిల్‌లో మస్క్‌ సమాధానమిచ్చాడు. దీంతో వీరిద్దరూ కేజ్‌ ఫైట్‌లో తలపడబోతున్నారంటూ ప్రచారం మొదలైంది.

ఏమిటీ కేజ్‌ ఫైట్‌..?

డబ్ల్యూడబ్ల్యూఈ (WWE) చూసే వారికి ఈ ఫైట్‌ గురించి తెలిసే ఉంటుంది. చుట్టూ బోనులాంటి ఆకారం ఉంటుంది. అందులో తలపడే రెజ్లర్లు మాత్రమే ఉంటారు. ఎవరైతే ప్రత్యర్థిని కోలుకోలేకుండా దెబ్బతీసి ఆ బోను ఎక్కుతారో అతడిని విజేతగా ప్రకటిస్తారు.

ట్రైనింగ్‌లో మస్క్‌, జుకర్‌

తొలుత వీరి మధ్య పోరు ప్రచారంలా కనిపించినా.. తాజాగా వీరు ట్రైనింగ్‌ సెషన్‌లోనూ పాల్గొనడం చూస్తే ఫైట్‌ నిజమే అనిపిస్తోంది. రష్యన్‌-అమెరికన్‌ అయిన లెక్స్‌ ఫ్రిడ్‌మ్యాన్‌ తాజాగా చేసిన ట్వీట్‌ ఈ ఇందుకు బలం చేకూరుస్తోంది. ఇద్దరు బిలియనీర్లతో తాజాగా ట్రైనింగ్‌ సెషన్‌లో పాల్గొన్నానంటూ అతడు ట్వీట్ చేశాడు. ఎలాన్‌, జుకర్‌బర్గ్‌ మార్షల్‌ ఆర్ట్స్‌ ప్రతిభ చూస్తుంటే ఎంతో ముచ్చటేస్తోందని అందులో పేర్కొన్నాడు. వారిద్దరూ కేజ్‌ ఫైట్‌ చేయకుండా ఉంటేనే మంచిదని అభిప్రాయపడ్డాడు. ‘మస్క్‌ చెప్పినట్లుగా.. ఎంటర్‌టైన్‌మెంట్‌ మాత్రం పక్కా’ అని పేర్కొన్నాడు. ఇందుకోసం తాను ఆసక్తిగా ఎదురుచూస్తున్నట్లు తెలిపాడు. మస్క్‌ ట్రైనింగ్‌లో పాల్గొన్న ఫొటోనూ ట్వీట్‌లో జత చేశాడు. అంతకుముందు జుకర్‌బర్గ్‌కు ట్రైనింగ్‌ సెషన్‌ వీడియోనూ ప్రిడ్‌మ్యాన్‌ పోస్ట్‌ చేశాడు.

సోషల్‌మీడియాలో సందడే సందడి

మస్క్‌, జుకర్‌ బర్గ్‌ మధ్య కేజ్‌ ఫైట్‌ నిజంగానే జరుగుతుందో లేదో గానీ సోషల్‌ మీడియాలో మాత్రం దీని గురించి గట్టిగానే చర్చ జరుగుతోంది. ఒకవేళ తలపడితే వీరిద్దరిలో ఎవరు గెలుస్తారు? అంటూ అప్పుడే పోస్టులు పెడుతున్నారు. 2020 నుంచి మార్షల్‌ ఆర్ట్స్‌లో శిక్షణ తీసుకుంటున్న జుకర్‌బర్గ్‌ చేతిలో మస్క్‌ ఓడిపోవడం ఖాయం అంటూ కొందరు పోస్టులు పెడుతుండగా.. మస్క్‌దే పైచేయి అవుతుందంటూ ఇంకొందరు పోస్టులు పెడుతున్నారు. దీనిపై రూపొందించిన కొన్ని మీమ్స్‌ సైతం నెట్టింట సందడి చేస్తున్నాయి. కొందరైతే ఏకంగా టీషర్టుల విక్రయాలు కూడా మొదలుపెట్టేశారు.

► Read latest Business News and Telugu News

► Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.