3 ఐపీఓలు.. రూ.6,400 కోట్ల లక్ష్యం

దిల్లీ: ఈ వారం మూడు కంపెనీల తొలి పబ్లిక్‌ ఆఫర్‌ (ఐపీఓ)లు మార్కెట్‌లో సందడి చేయనున్నాయి. రూ.6,400 కోట్ల సమీకరించే లక్ష్యంతో ఆధార్‌ హౌసింగ్‌ ఫైనాన్స్‌, ఇండీజీన్‌, టీబీఓ టెక్‌ ఐపీఓలు వస్తున్నాయి.

ఆధార్‌ హౌసింగ్‌ ఫైనాన్స్‌: బ్లాక్‌స్టోన్‌ పెట్టుబడులు కలిగిన ఆధార్‌ హౌసింగ్‌ ఫైనాన్స్‌ ఈ నెల 8న ప్రారంభమై 10న ముగియనుంది. ఒక్కో షేరుకు ధరల శ్రేణిగా రూ.300- 315 నిర్ణయించారు. గరిష్ఠ ధర వద్ద కంపెనీ  రూ.3000 కోట్లు సమీకరించనుంది. రిటైల్‌ మదుపర్లు 47 షేర్లకు దరఖాస్తు చేసుకోవాల్సి ఉంటుంది.

ఇండీజీన్‌: ఆరోగ్య సంరక్షణ టెక్‌ సంస్థ ఇండీజీన్‌ ఐపీఓ ఈ నెల 6న (నేడు) ప్రారంభమై 8న ముగియనుంది. ఇందుకు ధరల శ్రేణిగా రూ.430- 452 నిర్ణయించారు. గరిష్ఠ ధర వద్ద కంపెనీ రూ.1,842 కోట్లు సమీకరించనుంది. రిటైల్‌ మదుపర్లు కనీసం 33 షేర్లకు దరఖాస్తు చేసుకోవాలి.

టీబీఓ టెక్‌: ట్రావెల్‌ డిస్ట్రిబ్యూషన్‌ సంస్థ టీబీఓ టెక్‌ ఐపీఓ మే 8న ప్రారంభమై 10న ముగియనుంది. ధరల శ్రేణిగా రూ.875- 920 నిర్ణయించారు. గరిష్ఠ ధర వద్ద కంపెనీ  రూ.1,551 కోట్లు సమీకరించాలని భావిస్తోంది. రిటైల్‌ మదుపర్లు కనీసం 16 షేర్లకు దరఖాస్తు చేసుకోవాల్సి ఉంటుంది.

• 2004 నుంచి చూస్తే.. గత నాలుగు సార్వత్రిక ఎన్నికలు జరిగిన మే నెలల్లో ఒక్క ఐపీఓ కూడా మార్కెట్‌ ముందుకు రాలేదు. ఈ సారి అందుకు భిన్నంగా ఐపీఓలు వస్తున్నాయి.
• ఐపీఓ ద్వారా రూ.1300 కోట్లు సమీకరించేందుకు ముత్తూట్‌ ఫైనాన్స్‌ అనుబంధ సంస్థ బెల్‌స్టార్‌ మైక్రోఫైనాన్స్‌ ఆదివారం సెబీ వద్ద ముసాయిదా పత్రాలు దాఖలు చేసింది.