సంచార్‌ సాథీ పోర్టల్‌పై మొబైల్‌ ఫోన్లను బ్లాక్‌ చేయొచ్చు

దిల్లీ: దేశవ్యాప్తంగా పోగొట్టుకున్న లేదా చోరీకి గురైన మొబైల్‌ ఫోన్లను సంచార్‌ సాథీ పోర్టల్‌పై ప్రజలు బ్లాక్‌ చేయడంతో పాటు ట్రాక్‌ చేసుకోవచ్చని టెలికాం విభాగం (డాట్‌) వెల్లడించింది. మంగళవారం ఈ పోర్టల్‌ను డాట్‌ ప్రారంభించింది. వాడిన మొబైల్‌ ఫోన్‌ను కొనుగోలు చేయకముందే ఆ ఫోన్‌ వివరాలను ఈ పోర్టల్‌లో తనిఖీ చేసుకునే సదుపాయం ఉందని కేంద్ర టెలికాం మంత్రి అశ్వినీ వైష్ణవ్‌ పేర్కొన్నారు. ‘మొదటి విడత సంచార్‌ సాథీ పోర్టల్‌ను సెంట్రల్‌ ఎక్విప్‌మెంట్‌ ఐడెంటిటీ రిజిస్టర్‌ (సీఈఐఆర్‌)గా రూపొందించాం. ఎవరైనా మొబైల్‌ ఫోన్‌ పోగొట్టుకుంటే ఈ పోర్టల్‌ను సందర్శించొచ్చు. కొంత ధ్రువీకరణ తనిఖీల తర్వాత ఎన్‌ఫోర్స్‌మెంట్‌ సంస్థలు, టెలికాం సర్వీస్‌ ప్రొవైడర్లను సంప్రదించే సదుపాయం ఉంటుంది. అనంతరం మీ ఫోన్లను బ్లాక్‌ చేయొచ్చు’ అని వైష్ణవ్‌ తెలిపారు.

* వ్యక్తులు ఏ మొబైల్‌ నంబరుతో అయినా మోసపూరిత కార్యకలాపాలకు పాల్పడితే, ఆ సేవలను నిలిపివేయడానికి మెటాకు చెందిన వాట్సాప్‌ అంగీకరించినట్లు వైష్ణవ్‌ స్పష్టం చేశారు. వాట్సాప్‌ కాల్స్‌ ద్వారా మోసాలకు ప్రభుత్వం తీసుకుంటున్న చర్యల గురించి ప్రశ్నించగా ఈ సమాధానం ఇచ్చారు. అన్ని ఓటీటీ ప్లాట్‌ఫామ్‌లు సైతం ఇందుకు సహకరిస్తున్నాయన్నారు. మోసాలు చేసినందుకు ఇప్పటివరకు 36 లక్షల మొబైల్‌ కనెక్షన్‌లను నిలిపివేశామని, దీంతో వాటి వాట్సాప్‌ ఖాతాలు కూడా ఆగిపోయినట్లు వెల్లడించారు.