విప్రోలో మధ్యస్థాయి ఉద్యోగాల కోత.. ఆన్‌సైట్‌లో ఉన్నవారిపై ప్రభావం

ప్రముఖ ఐటీ సంస్థ విప్రో వందల కొద్దీ మధ్యస్థాయి ఉద్యోగులకు ‘లేఆఫ్‌’ ఇవ్వనుంది. ఇందువల్ల  ‘ఆన్‌సైట్‌’ ఉద్యోగులపైనే అధిక ప్రభావం ఉండనున్నట్లు ఈ వ్యవహారంతో సంబంధం ఉన్న వారిని ఉటంకిస్తూ ఆంగ్ల పత్రికలు పేర్కొన్నాయి. లాభదాయకతను పెంచుకునేందుకే సంస్థ ఇలా చేస్తోందని సమాచారం. డిసెంబరు త్రైమాసికంలో విప్రో మార్జిన్‌ 16 శాతంగా నమోదయ్యింది. అదే సమయంలో టీసీఎస్‌ 25%, ఇన్ఫోసిస్‌ 20.5%, హెచ్‌సీఎల్‌ టెక్నాలజీస్‌ 19.8% మార్జిన్‌ను ప్రకటించాయి. ఈ నేపథ్యంలోనే ఆన్‌సైట్‌లో ఉన్న మధ్యస్థాయి ఉద్యోగులను తగ్గించేందుకు విప్రో ప్రయత్నాలు మొదలుపెట్టినట్లు సంబంధిత వర్గాలు తెలిపాయి.

• దేశీయంగా పనిచేస్తున్న సిబ్బందితో పోలిస్తే, విదేశాల్లోని ఖాతాదారుల వద్ద (ఆన్‌సైట్‌) పనిచేసే ఉద్యోగులకు ఇచ్చే వేతనాలు అధికంగా ఉంటాయి. అందువల్ల వారిని తగ్గిస్తే, వేతన బిల్లు భారం రూపేణ కొంత తగ్గుతుంది. జనవరి ప్రారంభంలోనే సంబంధిత ఉద్యోగులకు ఈ విషయంపై సంస్థ సమాచారం ఇచ్చినట్లు తెలిసింది.
• 2021లో కన్సల్టింగ్‌ సేవల సంస్థ క్యాప్కోను 145 కోట్ల డాలర్ల (సుమారు రూ.12,035 కోట్ల)కు విప్రో స్వాధీనం చేసుకుంది. కొవిడ్‌ పరిణామాల తర్వాత వేర్వేరు కారణాలతో, ప్రపంచ వ్యాప్తంగా ఆర్థిక పరిస్థితులు మందగమనంలోనే సాగుతున్నాయి. ఈ నేపథ్యంలో కన్సల్టింగ్‌ సేవలకు అనుకూల వాతావరణం కనిపించడం లేదు. అదే సమయంలో క్యాప్కో సంస్థలో పనిచేస్తున్న ఆన్‌సైట్‌ ఉద్యోగులు విప్రోకు భారం అవుతున్నట్లు కంపెనీ వర్గాలు వెల్లడించాయి. సంస్థ లాభాల శాతాన్ని పెంచాలని చీఫ్‌ ఫైనాన్షియల్‌ ఆఫీసర్‌పై ఒత్తిడి ఉందని, ఫలితంగా ఈ నిర్ణయం తీసుకున్నారని పేర్కొన్నాయి.

హోదాల తగ్గింపు: మరోవైపు.. ఉన్నత స్థాయి ఉద్యోగుల హోదా కాస్త తగ్గించి, మధ్యస్థాయికి తీసుకురావడమనే వ్యూహాన్నీ పాటించేందుకు విప్రో సిద్ధం అవుతోంది. ‘లెవల్‌ 3లో ఉన్న ఉద్యోగి..లెవల్‌ 2లోనూ పనిచేయడం, అదే సమయంలో లెవల్‌ 1 ఉద్యోగితో లెవల్‌ 2 పనులను చేయించేందుకూ సంస్థ ప్రయత్నిస్తోంది. లెవల్‌ 1 ఉద్యోగాలను యాంత్రీకరణ చేసేందుకు ఉన్న అవకాశాలనూ కంపెనీ పరిశీలిస్తోంది. ఈ వ్యవహారంపై విప్రో ప్రతినిధి స్పందిస్తూ.. ‘మానవ వనరులు, నిపుణులపై పెట్టుబడులు పెట్టేందుకు సంస్థ ఎప్పుడూ సిద్ధంగానే ఉంటుంది. మారుతున్న మార్కెట్‌ పరిస్థితులకు అనుగుణంగా, అన్ని రకాలుగా సంస్థను బలోపేతం చేసే దిశగా చర్యలు తీసుకుంటున్న’ట్లు పేర్కొన్నారు.