LIC IPO: ఎల్‌ఐసీ ఐపీఓ దరఖాస్తుకు మరికొన్ని గంటలే..!

దిల్లీ:  లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) తొలి పబ్లిక్‌ ఆఫర్‌ (ఐపీఓ) దరఖాస్తుకు మరికొన్ని గంటల్లో గడువు ముగియనుంది. మే 4న ప్రారంభమైన ఈ ఐపీఓ సబ్‌స్క్రిప్షన్‌ నేటితో ముగియనుంది. ఇప్పటి వరకు మొత్తంగా 2.05 రెట్ల స్పందన లభించింది. ఎల్‌ఐసీ 16.20 కోట్ల షేర్లను పబ్లిక్‌ ఇష్యూకు కేటాయించగా.. 33.15 కోట్ల షేర్లకు బిడ్లు దాఖలైనట్లు స్టాక్‌ ఎక్స్ఛేంజీల గణాంకాల ద్వారా తెలుస్తోంది.

అర్హులైన సంస్థాగత మదుపర్ల (QIB) విభాగంలో 1.17 రెట్ల షేర్లకు బిడ్లు దాఖలయ్యాయి. సంస్థాగతేతర మదుపర్ల (NII) విభాగంలో 1.39 రెట్ల షేర్లకు, పాలసీదారుల కేటగిరీలో 5.38 రెట్లకు, రిటైల్‌ వ్యక్తిగత మదుపర్ల (Retail Investors) విభాగంలో 7.72 రెట్ల షేర్లకు బిడ్లు దాఖలయ్యాయి. ఉద్యోగుల విభాగంలో 4.01 రెట్ల స్పందన లభించింది.