Ola: పార్సిల్‌ డెలివరీ సేవల్లోకి ఓలా.. తొలుత ఈ నగరంలో..!

ఇంటర్నెట్‌డెస్క్‌: ప్రముఖ క్యాబ్ బుకింగ్‌ సేవల సంస్థ ఓలా (Ola) తాజాగా పార్సిల్‌ డెలివరీ రంగంలోకి అడుగుపెట్టింది. ఇప్పటివరకు రైడ్‌ సేవల్ని మాత్రమే అందిస్తున్న సంస్థ ఇకపై డెలివరీలు అందించేందుకు సిద్ధమైంది. ‘ఓలా పార్సిల్‌’ పేరిట డెలివరీ సేవల్ని ప్రారంభించింది. బెంగళూరు వాసులకు ఈ సేవల్ని మొదటగా పరిచయం చేసింది.

ఎయిరిండియా విమానాల నయా లుక్‌.. ఫొటోలు వైరల్‌

‘బెంగళూరులో ‘ఓలా పార్సిల్‌’ను ప్రారంభించాం.  ఈ  సేవల్ని అందించటం కోసం ఓలా ఎలక్ట్రిక్‌ స్కూటర్లను మాత్రమే ఉపయోగిస్తాం’ అని  ఓలా సహ వ్యవస్థాపకుడు, సీఈఓ భవీశ్‌ అగర్వాల్‌ (Bhavish Aggarwal) తన అధికారిక ‘ఎక్స్‌’ ద్వారా ప్రకటించారు. 5 కిలోమీటర్ల లోపు దూరానికి రూ.25.. 15 కిలోమీటర్ల దూరానికి రూ.75.. అలాగే 20 కిలోమీటర్ల దూరానికి రూ.100 ఛార్జీలు వసూలు చేయనున్నట్లు ఆయన తెలిపారు. ప్రస్తుతం బెంగళూరు నగరమంతా ఈ పార్సిల్‌ సర్వీసుల్ని అందుబాటులోకి తెచ్చినట్లు ఓలా తెలిపింది. రానున్న నెలల్లో దేశవ్యాప్తంగా అన్ని నగరాలకు ఈ సేవల్ని విస్తృతం చేయనున్నట్లు పేర్కొంది.