Kolkata: హల్దియా రిఫైనరీలో అగ్ని ప్రమాదం.. ముగ్గురు మృతి, ఏడుగురి పరిస్థితి విషమం

హల్దియా: పశ్చిమ బెంగాల్‌లోని పుర్బా మేదినీపూర్‌ జిల్లాలో ఇండియన్‌ ఆయిల్‌ కార్పొరేషన్‌ (ఐఓసీ)కు చెందిన హల్దియా రిఫైనరీలో అగ్నిప్రమాదం చోటుచేసుకుంది. ఈ ఘటనలో ముగ్గురు మృతిచెందగా, దాదాపు 44 మంది గాయపడినట్లు పోలీసులు వెల్లడించారు. రిఫైనరీ యూనిట్‌లో షట్‌డౌన్‌కు సంబంధించిన పనులు జరుగుతున్న సమయంలో ప్రమాదం చోటుచేసుకుందని ఐఓసీ వర్గాలు ఓ ప్రకటనలో తెలిపాయి. మంటలను ఆర్పివేసి, పరిస్థితిని అదుపుచేసినట్లు పేర్కొన్నారు. గాయపడిన 44 మందిలో 37మందిని కోల్‌కతాలోని ఆస్పత్రిలో చేర్పించి చికిత్స అందిస్తున్నట్టు తెలిపారు. వీరిలో ఏడుగురి పరిస్థితి విషమంగా ఉన్నట్లు పుర్బా మేదినీపూర్‌ జిల్లాకు చెందిన సీనియర్‌ పోలీసు అధికారి ఒకరు వెల్లడించారు. ఘటనపై సీఎం మమతా బెనర్జీ దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి ప్రకటించారు. గాయపడిన వారిని గ్రీన్‌ కారిడార్‌ ద్వారా ఆస్పత్రికి తరలించామని,  ప్రభుత్వం అన్ని విధాలా సహాయ సహకారాలు అందిస్తుందని ఆమె తెలిపారు. క్షతగాత్రులు త్వరగా కోలుకోవాలని ఆకాంక్షిస్తూ దీదీ ట్వీట్‌ చేశారు.