Drug case: ఇంట్లో డ్రగ్స్‌.. పోలీసుల భయంతో బాత్​రూమ్‌లో దాక్కున్న నటి

బెంగళూరు: మాదక ద్రవ్యాల వ్యవహారం కర్ణాటకను కుదిపేస్తోంది. ఇదివరకే కథానాయికలు రాగిణి ద్వివేది, సంజనా గల్రానీ అరెస్టు కాగా.. ఇప్పుడు ప్రముఖ మోడల్​ సహా మరికొందరిని పోలీసులు అదుపులోకి తీసుకున్నారు. బెంగళూరులో వేర్వేరు ప్రాంతాల్లో పోలీసులు జరిపిన సోదాల్లో నటి, మోడల్​, కాస్మోటిక్ వ్యాపారం నిర్వహించే సోనియా అగర్వాల్​, మరో వ్యాపారవేత్త భరత్​, డీజే వచన్​ చిన్నప్ప ఫ్లాట్లలో డ్రగ్స్​ బయటపడ్డాయి. ప్రస్తుతం వీరిని పోలీసులు విచారిస్తున్నారు. వీరందరికీ నైజీరియా డ్రగ్స్​ పెడ్లర్లతో సంబంధాలు ఉన్నాయని పోలీసులు తెలిపారు. సినీ రంగానికి చెందిన చాలా మందికి ఇందులో ప్రమేయం ఉన్నట్లు అనుమానిస్తున్నారు.

రాజాజీనగర్​లోని సోనియా ఇంట్లో జరిపిన సోదాల్లో 40 గ్రాముల గంజాయి దొరికినట్లు సమాచారం. ఆ సమయంలో మోడల్​ ఇంట్లో లేదు. ఓ హోటల్​లో ఆమె ఉందన్న సమాచారంతో అక్కడికి వెళ్లగా.. పోలీసుల కళ్లుగప్పి తప్పించుకొనే ప్రయత్నం చేసింది. బాత్‌​​రూంలో దాక్కున్న ఆమెను పోలీసులు బయటకు తీసుకొచ్చారు. పోలీసుల విచారణలో నైజీరియా డ్రగ్స్​ వ్యాపారి థామస్​తో తనకు పరిచయం ఉందని సోనియా అంగీకరించింది. కొన్ని పార్టీలకు డ్రగ్స్​ సరఫరా చేసినట్లు తెలిపింది. చాలా మంది రాజకీయ నాయకులు, స్టార్​ నటీనటుల పిల్లలు, కథానాయికలతోనూ తనకు పరిచయాలున్నాయని పేర్కొంది. వ్యాపారవేత్త భరత్​, డీజే వచన్​ చిన్నప్ప ఇళ్లలోనూ డ్రగ్స్‌ బయటపడగా.. వారిని పోలీసులు అరెస్టు చేశారు.

సోనియా అగర్వాల్‌ అంటే.. 7/G బృందావన కాలనీ ఫేమ్‌ కాదు!

నటి, మోడల్​ సోనియా అగర్వాల్​ ఇంట్లో గంజాయి దొరికిందనగానే.. చాలా మంది 7/G బృందావన కాలనీ ఫేమ్ సోనియా అగర్వాల్​ అనుకున్నారు. పలు మీడియా సంస్థల్లో ఇలా వార్తలు కూడా వచ్చాయి. ఆ నటి ఈ వార్తలను కొట్టిపారేసింది. డ్రగ్స్​ కేసుతో తనకేం సంబంధం లేదని, ఆ ఆరోపణలతో తన కుటుంబం ఆవేదనకు గురవుతున్నట్లు పేర్కొంది. తప్పుడు ఆరోపణలు చేసిన వారిపై చర్యలు తీసుకోనున్నట్లు స్పష్టం చేసింది. ఈ మేరకు ట్విట్టర్​లో ఓ ఆడియో విడుదల చేసింది.