కమాండోను గొలుసులతో కట్టి..కొట్టి..

గొలుసులతో కట్టివేసి ఉంచడంపై రేగిన దుమారం

దిల్లీ: మాస్కు ధరించలేదని ఓ సీఆర్‌పీఎఫ్‌ జవానును అరెస్టు చేసిన పోలీసులు అతడిని గొలుసులతో కట్టివేసి ఉంచడం సంచలనం కలిగించిఇంది. కర్ణాటక రాష్ట్రం బెలగావి పోలీసుస్టేషన్‌లో కమాండో సచిన్ సునీల్ సావంత్‌ను గొలుసులతో కట్టివేసి ఉంచిన ఓ వీడియో సామాజిక మాధ్యమాల్లో దుమారం రేపింది. ఆ వీడియోను ఓ ట్విటర్ యూజర్ పోస్ట్ చేయగా.. దీనిపై సీఆర్‌పీఎఫ్ ఉన్నతాధికారులు స్పందించారు. కర్ణాటక రాష్ట్ర పోలీసు ఉన్నతాధికారికి ఈ విషయంపై లేఖ రాశారు. ఈసందర్భంగా సీఆర్‌పీఎఫ్‌ డీఐజీ మాట్లాడుతూ.. ఈ కేసును కర్ణాటక పోలీసు ఉన్నతాధికారుల దృష్టికి తీసుకెళ్లామని, వచ్చే మంగళవారం కమాండో బెయిల్‌ పిటిషన్ కోర్టు ముందుకు వస్తుందని తెలిపారు. కేసును ఓ కొలిక్కి తీసుకురావడానికి దర్యాప్తు కొనసాగించాలని పేర్కొన్నారు.

ఈ కేసుపై స్పందించిన కర్ణాటక పోలీసులు మాట్లాడుతూ.. లాక్‌డౌన్‌ నేపథ్యంలో ఏప్రిల్‌ 23న ఎలాంటి మాస్కు ధరించకుండా సావంత్‌ వీధుల్లో సంచరిస్తున్నాడని, ప్రశ్నించిన పోలీసుపై దురుసుగా ప్రవర్తించి అనుచిత వ్యాఖ్యలు చేసినట్లు వెల్లడించారు. అందుకే అరెస్టు చేసి ఠాణాకు తరలించి బంధించినట్లు తెలిపారు. ఈ కేసుపై స్పందించిన సావంత్‌ కుటుంబసభ్యులు పోలీసులు కమాండోని లాఠీలతో కొట్టారని, అతడిని హింసించారని ఆరోపించారు. కమాండో సావంత్‌ ఏప్రిల్‌ 11 వరకు సెలవుపై ఉన్నాడు. లాక్‌డౌన్‌ నేపథ్యంలో అతడు సెలవులు పొడిగించుకోవాల్సి వచ్చింది.