Crime News: ఆవుపై అఘాయిత్యం.. ఉరి పడి గోమాత మృతి

లోకేశ్వరం, న్యూస్‌టుడే: హిందువులు ఆరాధ్య దైౖవంగా, గోమాతగా పిలుచుకునే ఆవుపైనే అఘాయిత్యానికి పాల్పడ్డ ఘటన బుధవారం అర్ధరాత్రి నిర్మల్‌ జిల్లా లోకేశ్వరం మండలంలోని పిప్రి గ్రామంలో చోటుచేసుకుంది. ఈ ఘటనలో కిటికీ ఊచలకు కట్టిన తాడు మెడకు ఉరిపడి గోమాత మృతిచెందింది. స్థానిక ఎస్సై సాయికుమార్‌ తెలిపిన వివరాల ప్రకారం.. పిప్రి గ్రామానికి చెందిన రైతు రావుల సాయన్న కొత్త ఇల్లు నిర్మించుకుంటున్నారు. ఇంట్లో మార్బుల్‌ వేసేందుకు ఉత్తరప్రదేశ్‌కు చెందిన కూలీలను తెప్పించారు. వీరిలో నిందితుడు విజయ్‌ బుధవారం అందరూ నిద్రించాక సాయన్నకు చెందిన ఆవును నూతన గృహంలోకి తీసుకొచ్చి కిటికీ ఊచలకు తాడుతో బంధించి అత్యాచారానికి ఒడిగట్టాడు. పెనుగులాటలో మార్బుల్‌ బండలు జారి ఊచలకు కట్టిన తాడు మెడకు ఉరిగా బిగించుకోవడంతో ఆవు మృతిచెందింది. ఉదయం పెరట్లో గోమాత కనిపించక పోవడంతో వెతికిన రైతుకు కొత్త ఇంట్లో మరణించి ఉండడం, కూలీ విజయ్‌ అనుమానాస్పదంగా కనిపించడంతో పోలీసులకు సమాచారం అందించారు. విషయం తెలుసుకున్న ఎస్సై సంఘటనా స్థలానికి చేరుకుని విచారించగా సదరు కూలీ తను చేసిన అఘాయిత్యాన్ని ఒప్పుకోవడంతో నిందితుడిని అదుపులోకి తీసుకున్నారు. పశువైద్యాధికారి జెస్సీ గోవుకు పోస్టుమార్టం నిర్వహించి ఫోరెన్సిక్‌ ల్యాబ్‌కు పంపించారు.