Andhra News: అమెరికాలో శ్రీకాకుళం యువకుడి మృతి

ఉద్యోగంలో చేరిన 3 రోజులకే ప్రమాదం

సంతబొమ్మాళి, న్యూస్‌టుడే: ఉన్న ఊరిలో ఉపాధి దొరకలేదు. బతుకు దెరువు కోసం విదేశాలకు వెళ్లారు. అక్కడ సంపాదించిన డబ్బుతో అప్పులు తీర్చాలని భావించిన ఆ యువకుడు విధుల్లో చేరిన 3 రోజులకే ప్రమాదవశాత్తూ మృతి చెందారు. కుటుంబ సభ్యులు, స్థానికుల వివరాల మేరకు.. శ్రీకాకుళం జిల్లా సంతబొమ్మాళి మండలంలోని ఎం.సున్నాపల్లి గ్రామానికి చెందిన టి.రవికుమార్‌ (35) నౌకలో పని చేసేందుకు మరో 10 మందితో కలిసి ఈనెల 17న అమెరికాకు వెళ్లారు. 3 రోజులకిందట సీమన్‌గా ఉద్యోగంలోచేరారు. బుధవారం సాయంత్రం విధులు నిర్వహిస్తుండగా ప్రమాదవశాత్తూ కంటెయినర్‌పై నుంచి జారిపడి రవికుమార్‌ అక్కడికక్కడే మృతి చెందారు. గురువారం మధ్యాహ్నం 2 గంటలకు కంపెనీ ప్రతినిధులు బాధిత కుటుంబ సభ్యులకు సమాచారమిచ్చారు. ఆయనకు భార్య శ్రావణి, ఇద్దరు కుమార్తెలున్నారు. మృత దేహాన్ని స్వదేశానికి తీసుకొచ్చేందుకు ప్రభుత్వం చర్యలు తీసుకోవాలని కుటుంబ సభ్యులు కోరుతున్నారు.