Hyderabad News: హాష్‌ ఆయిల్‌ కీలక సూత్రధారి లక్ష్మీపతి అరెస్టు

హైదరాబాద్‌: డ్రగ్స్‌ కేసుల దర్యాప్తును పోలీసులు వేగవంతం చేశారు. నగరంలో డ్రగ్స్‌కు బానిసై ఇటీవల బీటెక్‌ విద్యార్థి మృతి చెందిన విషయం తెలిసిందే. ఈ కేసులో డ్రగ్స్‌ విక్రేత ప్రేమ్‌ ఉపాధ్యాయ్‌కి హాష్‌ ఆయిల్‌  (గంజాయి నుంచి తీసిన నూనె) సరఫరా చేసిన కీలక సూత్రధారి లక్ష్మీపతిని పోలీసులు ఎట్టకేలకు అదుపులోకి తీసుకున్నారు. ఉమ్మడి తూర్పుగోదావరి జిల్లాకు చెందిన లక్ష్మీపతిని హైదరాబాద్ నార్కోటిక్ నియంత్రణ విభాగం పోలీసులు రెండు రోజుల క్రితం అదుపులోకి తీసుకున్నారు. బీటెక్ విద్యార్థికి మాదకద్రవ్యాలు సరఫరా చేసిన ప్రేమ్ ఉపాధ్యాయ్‌తో పాటు ముగ్గురు వినియోగదారులను వారం క్రితం అరెస్టు చేశారు. అప్పటి నుంచి పరారీలో ఉన్న లక్ష్మీపతి కోసం పోలీసులు బృందాలుగా ఏర్పడి గాలించారు. వైజాగ్, విజయవాడ, బెంగళూరు, గోవాకు బృందాలుగా వెళ్లి గాలించారు. హాష్ ఆయిల్ ఎక్కడి నుంచి తీసుకొస్తున్నారు? ఎవరెవరికి సరఫరా చేస్తున్నారనే విషయాలను నార్కోటిక్ విభాగం పోలీసులు సేకరిస్తున్నారు.

లక్ష్మీపతి బీటెక్ చదువుతున్న సమయంలో గంజాయికి బానిసయ్యాడు. ఆ తర్వాత గంజాయి విక్రయించడం మొదలు పెట్టాడు. సాఫ్ట్‌వేర్‌ ఇంజినీర్లకు హాష్ ఆయిల్ సరఫరా చేయడం ప్రారంభించాడు. దాదాపు 100 మంది వరకు లక్ష్మీపతి నుంచి హాష్ ఆయిల్ కొనుగోలు చేసినట్టు పోలీసులు అనుమానిస్తున్నారు. ఐసో ప్రొపైల్ ఆల్కహాల్‌లో గంజాయి మొగ్గలను మరిగించి దాని ద్వారా వచ్చే ద్రావణాన్ని లక్ష్మీపతి విక్రయిస్తున్నాడు. లీటర్ హాష్ ఆయిల్‌ను రూ. 6 లక్షల వరకు విక్రయిస్తున్నాడు. 10 మి.లీటర్లను చిన్న సీసాల్లో నింపి వాటిని వినియోగదారులకు చేరవేస్తున్నాడు. నగరంలోని మాదాపూర్, కొండాపూర్, నార్సింగి ప్రాంతాల్లో గదులు అద్దెకు తీసుకొని.. అక్కడ పార్టీలు ఏర్పాటు చేసి సాఫ్ట్‌వేర్‌ ఉద్యోగులను ఆహ్వానిస్తున్నట్లు పోలీసులు గుర్తించారు. సామాజిక మాధ్యమాల ద్వారా గ్రూపులు ఏర్పాటు చేసి మాదక ద్రవ్యాల సరఫరాకు సంబంధించిన సమాచారాన్ని లక్ష్మీపతి చేరవేస్తున్నట్లు పోలీసులు గుర్తించారు. ప్రస్తుతం లక్ష్మీపతికి హాష్ ఆయిల్ సరఫరా చేస్తున్న ముఠాను గుర్తించేందుకు నార్కోటిక్ నియంత్రణ విభాగం పోలీసులు ప్రయత్నిస్తున్నారు.