India vs Australia: హాట్‌కేకుల్లా.. ‘టీ-20’ టికెట్లు..

న్యూస్‌టుడే, విశాఖ క్రీడలు

టికెట్లు పొందిన ఆనందంలో ఓ యువతి

పీఎంపాలెం ఏసీఏ-వీడీసీఏ స్టేడియంలో ఈనెల 23న జరగనున్న భారత్‌-ఆస్ట్రేలియా టీ-20 మ్యాచ్‌కు ఆఫ్‌లైన్‌లో టికెట్ల విక్రయాలు శుక్రవారం ప్రారంభమయ్యాయి. ఇందిరాప్రియదర్శిని మున్సిపల్‌ స్టేడియం, పీఎంపాలెం క్రికెట్‌ స్టేడియం, గాజువాకలో రాజీవ్‌గాంధీ స్టేడియంల వద్ద మహిళలకు, పురుషులకు ప్రత్యేక కౌంటర్లు ఏర్పాటు చేశారు. ఉదయం నుంచే ఆయా కేంద్రాల వద్దకు భారీగా అభిమానులు చేరుకున్నారు. తొలిరోజు 5వేల టికెట్లను అందుబాటులో ఉంచగా, రూ.600 టికెట్లు గంట వ్యవధిలోనే అయిపోయాయి. క్యూలైన్‌లో గంటల తరబడి నిల్చున్నా టికెట్లు దొరక్కపోవడంతో పలువురు అభిమానులు నిరాశ చెందారు. మురికివాడల నుంచి వచ్చిన పలువురు మహిళలు గురువారం అర్ధరాత్రి నుంచే క్యూలైనులో కాపు కాశారు. వీరు బ్లాక్‌లో ఆయా టికెట్లను విక్రయించినట్లు ఆరోపణలు వస్తున్నాయి. ఏసీఏ కార్యదర్శి ఎస్‌.ఆర్‌.గోపీనాథరెడ్డి కౌంటర్లను పరిశీలించారు. రూ.600, రూ.1500, రూ.2వేలు, రూ.3వేలు, రూ.3,500, రూ.6వేల విలువ కలిగిన టికెట్లు రోజుకు అయిదువేల చొప్పున అందుబాటులో ఉంచుతున్నామని తెలిపారు. శనివారం కూడా ఆయా కేంద్రాల వద్ద టికెట్ల విక్రయాలు జరుగుతాయన్నారు. ఆన్‌లైన్‌లో కొనుగోలు చేసిన వారు ఇందిరా ప్రియదర్శిని మున్సిపల్‌ స్టేడియం, గాజువాక రాజీవ్‌గాంధీ ఇండోర్‌ స్టేడియంల వద్ద ఈనెల 22 లోగా, పీఎంపాలెం క్రికెట్‌ స్టేడియం వద్ద 23వ తేదీ వరకు రెడీమ్‌ చేసుకోవచ్చని తెలిపారు.

ఇందిరాప్రియదర్శిని మున్సిపల్‌ స్టేడియం వద్ద క్యూలైన్లలో అభిమానులు

పీఎంపాలెం క్రికెట్‌ స్టేడియం వద్ద..

క్రికెట్‌ స్టేడియం కౌంటరు వద్ద బౌన్సరుకు సూచనలిస్తున్న ఏసీఏ కార్యదర్శి గోపీనాథరెడ్డి