మహిళపై ప్రియుడి దాడి

జి.మాడుగుల, న్యూస్‌టుడే: మహిళపై ఆమె ప్రియుడు కత్తితో దాడి చేసిన ఘటన ఆలస్యంగా వెలుగు చూసింది. లువ్వాసింగి పంచాయతీ వలసమామిడి గ్రామానికి చెందిన సారే సత్యవతి భర్త చనిపోవడంతో అదే గ్రామానికి చెందిన మసాడి విశ్వేశ్వరరావుతో సహజీవనం చేస్తోంది. వీరికి ఇద్దరు పిల్లలు ఉన్నారు. ఈ నెల 21న రాత్రి ఇద్దరి మధ్య వివాదం తలెత్తింది. కోపోద్రిక్తుడైన   విశ్వేశ్వరరావు కత్తితో సత్యవతిని తీవ్రంగా గాయపరిచాడు. ఆమెను కుటుంబసభ్యులు విశాఖ కేజీహెచ్‌కు తరలించారు. ఆరోగ్య పరిస్థితి విషమంగా ఉంది. ఈ మేరకు బాధితురాలి తల్లి పార్వతమ్మ మంగళవారం ఫిర్యాదు చేయడంతో పోలీసులు కేసు నమోదు చేశారు.