రాష్ట్ర స్థాయి జూనియర్‌ బాస్కెట్‌ బాల్‌ ఛాంప్‌ కృష్ణా

బహుమతితో ఉమ్మడి కృష్ణా జిల్లా బాలుర జట్టు

విజయవాడ క్రీడలు, న్యూస్‌టుడే: విశాఖలో ఈ నెల 25వ తేదీ నుంచి నాలుగు రోజుల పాటు జరిగిన 7వ రాష్ట్ర స్థాయి జూనియర్‌ (అండర్‌-18)బాలబాలికల బాస్కెట్‌బాల్‌ ఛాంపియన్‌షిప్‌లో ఉమ్మడి కృష్ణా జిల్లా బాలుర జట్టు ఛాంపియన్‌షిప్‌ ట్రోఫీ కైవసం చేసుకుందని జిల్లా బాస్కెట్‌బాల్‌ సంఘం అధ్యక్ష, కార్యదర్శులు జీఎస్‌సీ బోస్‌, జె.రామచంద్రరావు తెలిపారు. మంగళవారం సాయంత్రం జరిగిన తుది పోరులో కృష్ణా జట్టు 55-34 స్కోర్‌ తేడాతో అనంతపురం జిల్లా జట్టుపై సునాయాసంగా గెలిచింది.

ఈతలో విద్యార్థి ప్రతిభ

విజయవాడ క్రీడలు, న్యూస్‌టుడే: నగరంలోని ఢిల్లీ పబ్లిక్‌ స్కూల్‌ (డీపీఎస్‌)లో పదో తరగతి చదువుతున్న ఎంఎన్‌ఎస్‌ రోహన్‌ రాష్ట్ర స్థాయి స్విమ్మింగ్‌ ఛాంపియన్‌షిప్‌లో కాంస్య పతకం కైవసం చేసుకున్నాడని స్కూల్‌ ప్రిన్సిపల్‌ భువన్‌ తెలిపారు. ఈ నెల 25, 26 తేదీల్లో నెల్లూరు జిల్లా కావలిలో జరిగిన రాష్ట్ర స్థాయి స్విమ్మింగ్‌ ఛాంపియన్‌షిప్‌లో గుంటూరు జిల్లా స్విమ్మింగ్‌ జట్టుకు ప్రాతినిధ్యం వహించిన రోహన్‌ గ్రూపు-2 కేటగిరీ బాలుర విభాగంలో 200 మీ బ్రెస్ట్‌ స్ట్రోక్‌ను 3 నిమిషాల, 16.16 సెకన్లలో పూర్తిచేసి తృతీయ స్థానంలో నిలిచాడని పేర్కొన్నారు. ఈ సందర్భంగా మంగళవారం స్కూల్‌లో ఏర్పాటుచేసిన కార్యక్రమంలో స్కూల్‌ డైరెక్టర్‌ పరిమి పవన్‌ చంద్‌, డీన్‌ ఎస్‌బీ రావులు.. రోహన్‌ను అభినందించారు. వైస్‌ ప్రిన్సిపల్‌ సంజయ్‌ భాటియా, పలువురు ఉపాధ్యాయులు, విద్యార్థులు పాల్గొన్నారు.

30న అండర్‌-19 చదరంగ పోటీలు

విజయవాడ క్రీడలు, న్యూస్‌టుడే: ది విజయవాడ చెస్‌ సంఘం ఆధ్వర్యంలో ఈ నెల 30వ తేదీన నగరంలోని బర్డ్స్‌ సాంగ్‌ ఎడ్యుకేషన్‌ ప్రైవేట్‌ లిమిటెడ్‌ ప్రాంగణంలో ఉమ్మడి కృష్ణా జిల్లా అండర్‌-19 బాలబాలికల చదరంగ పోటీలు నిర్వహిస్తామని ఆ సంఘం అధ్యక్ష, కార్యదర్శులు ఎండీ అక్బర్‌ పాషా, ఎం.రాజీవ్‌ తెలిపారు. జనవరి ఒకటి, 2003 తర్వాత జన్మించినవారు పోటీలో తలపడేందుకు అర్హులన్నారు. ఆసక్తిగల క్రీడాకారులు సొంత చదరంగ కిట్లతో అదే రోజు ఉదయం 8 గంటల్లోపు హజరవ్వాలని పేర్కొన్నారు. వివరాలకు 90303 08811 నంబరులో సంప్రదించాలని సూచించారు.

జాతీయ జూనియర్‌ ఫెన్సింగ్‌ ఛాంపియన్‌షిప్‌కు రాష్ట్ర జట్టు

విజయవాడ క్రీడలు, న్యూస్‌టుడే: కటక్‌లో ఈ నెల 29వ తేదీ నుంచి నాలుగు రోజుల పాటు జరిగే 30వ జాతీయ జూనియర్‌ బాలబాలికల ఫెన్సింగ్‌ ఛాంపియన్‌షిప్‌లో తలపడే రాష్ట్ర జట్టును రాష్ట్ర ఫెన్సింగ్‌ సంఘం ప్రధాన కార్యదర్శి జీఎస్వీ కృష్ణమోహన్‌ మంగళవారం వెల్లడించారు.

* బాలుర విభాగం: ఫాయల్‌లో డి.రాజు, ఎల్‌.సాయి నిఖిల్‌ రాజ్‌, సీహెచ్‌పీఎల్‌ విష్ణువర్థన్‌ నాయుడు, ఎన్‌.చరణ్‌ తేజ, ఎపీలో జె.వెంకట ధన్వి, కె.సాయి ప్రీతమ్‌, కె.నాగేంద్రనాథ్‌, కె.రోహన్‌, సాబ్రెలో ఎన్‌.వంశీ ప్రదీప్‌ యాదవ్‌, కె.సురుత్‌ సింహ, పి.సాయి తారక్‌ హర్ష, బి.హరి చంద్రప్రసాద్‌. ఈ జట్టుకు కోచ్‌గా బి.అశోక్‌, మేనేజరుగా ఎం.సతీష్‌ నియమితులయ్యారు.

* బాలికల విభాగం: ఫాయల్‌లో జి.అక్షయ, బి.హిమ సాయివర్ష, ఎస్‌.మోబినా, ఎన్‌.రూప నిహారికారెడ్డి, ఎపీలో ఎస్‌.మౌనిక, హెచ్‌ చరణ్య సిరి, వై.ఉమామహేశ్వరి, వై.జ్యోతి, సాబ్రెలో వై.లక్ష్మీ లావణ్య, పి.భావగ్న, పి.గ్రీష్మ, కె.అమూల్య. ఈ జట్టుకు కోచ్‌గా జె.వంశీ, మేనేజరుగా డి.భవాని నియమితులయ్యారు.