ఎనికేపాడులో వ్యక్తి హత్య?

ఆటోనగర్‌: ఎనికేపాడు సమీపంలో ఓ వ్యక్తి అనుమానాస్పద స్థితిలో మృతి చెందాడు.  పోలీసుల కథనం ప్రకారం.. ఆదివారం రాత్రి 8 గంటల సమయంలో ఎనికేపాడులోని ఓ ఫార్మసీ కళాశాల ప్రహరీ సమీపంలో పక్కన ఖాళీ స్థలంలో ఓ వ్యక్తి పడి ఉండడాన్ని గమనించిన కాలేజీ సిబ్బంది పోలీసులకు సమాచారం ఇచ్చారు. వారు సంఘటన స్థలానికి చేరుకుని అతను మృతిచెందినట్లుగా నిర్ధారించారు. ఆ వ్యక్తిని యనమలకుదురుకు చెందిన పాలబత్తిన ఓబయ్య(50)గా గుర్తించి, అతని కుమారుడు ఓంకారమూర్తికి పోలీసులు సమాచారం అందించారు. సంఘటన స్థలానికి చేరుకున్న అతడు తన తండ్రి శనివారం రాత్రి 7 గంటలకు తన దగ్గరకు వచ్చి కొంత నగదు తీసుకెళ్లాడని చెప్పాడు. అతడి ఫిర్యాదు మేరకు పోలీసులు అనుమానాస్పద మృతి కింద కేసు నమోదు చేసి దర్యాప్తు చేస్తున్నారు.

కుమారుడి పాత్రపై అనూమానాలు..: ఓబయ్య రోజువారీ కూలి పనులు చేసుకుంటూ జీవనం సాగిస్తున్నాడు. అతను భార్యతో విడిపోయి 20 ఏళ్లుగా విడిగా ఉంటున్నాడు. కుమారుడు నాగ ఓంకార మూర్తి, తల్లితో కలసి ఉంటూ పటమట రైతు బజారులో కూరగాయలు అమ్ముతూ జీవనం సాగిస్తున్నారు. ఈ కేసులో ఓంకార మూర్తి పాత్రపై పోలీసులు అనూమానం వ్యక్తం చేస్తున్నారు. అడిగిన ప్రశ్నలకు కొన్ని పొంతన లేని సమాధానాలు చెప్పడంతో అదుపులోకి తీసుకుని విచారిస్తున్నట్లు సమాచారం. మృతుడి మెడపై గాయాలు ఉండటంతో ఇది హత్యేనని భావిస్తున్నారు.