మరికొద్ది గంటల్లో అమెరికా వెళ్లాల్సి ఉండగా..

రోడ్డు ప్రమాదంలో యువతి దుర్మరణం.. నలుగురికి గాయాలు

జాతీయ రహదారిపై పల్టీకొట్టిన కారు

కేతేపల్లి, న్యూస్‌టుడే: మరికొద్ది గంటల్లో అమెరికా వెళ్లాల్సిన యువతి రోడ్డు ప్రమాదంలో మృత్యువాత పడిన ఘటన నల్గొండ జిల్లా కేతేపల్లి మండలం చీకటిగూడెం గ్రామ శివారులో శనివారం చోటు చేసుకుంది. పోలీసులు తెలిపిన వివరాల ప్రకారం.... విజయవాడకు చెందిన కరణం పద్మా నాయుడు కుటుంబం కొన్నేళ్ల క్రితం అమెరికాలో స్థిరపడింది. ఇటీవల వారి బంధువుల కుటుంబంలో జరిగిన వివాహానికి పద్మా నాయుడు కుమార్తె ప్రీతి వచ్చారు. ఆమె శనివారం రాత్రి అమెరికా వెళ్లాల్సి ఉంది. ప్రీతిని విమానాశ్రయంలో వదిలేందుకు సమీప బంధువులు శనివారం విజయవాడ నుంచి హైదరాబాద్‌కు కారులో బయలుదేరారు. కారు చీకటిగూడెం శివారుకు రాగానే సూర్యాపేట నుంచి హైదరాబాద్‌ వెళుతున్న గుర్తు తెలియని వాహనం వెనుక నుంచి అతివేగంగా ఢీకొట్టింది. ఈ ప్రమాదంలో కారు జాతీయ రహదారిపై మూడు పల్టీలు కొట్టింది. తలకు తీవ్ర గాయాలైన కరణం ప్రీతి(21) అక్కడికక్కడే మృతి చెందారు. కారు నడుపుతున్న దొప్పలపూడి శ్రేయాస్‌, అందులో ప్రయాణిస్తున్న చేకూరి సరిత, దివి విశ్వవిఖ్యాత్‌, దివి పద్మావతిలకు గాయాలయ్యాయి. ప్రీతి మృతదేహాన్ని పోస్టుమార్టం నిమిత్తం, క్షతగాత్రులను చికిత్స కోసం నకిరేకల్‌ ప్రభుత్వాసుపత్రికి తరలించారు. కేసు నమోదు చేసి దర్యాప్తు జరుపుతున్నామని కేతేపల్లి ఏఎస్సై ఎన్‌.శ్రీనివాస్‌ వివరించారు.