ఇసుక రేవులకు పర్యావరణ అనుమతి

ఆజాద్‌నగర్‌, న్యూస్‌టుడే: జిల్లాలో కొత్తగా 12 బహిరంగ (ఓపెన్‌ రీచ్‌)ఇసుక రేవులకు పర్యావరణ అనుమతులు మంజూరు చేసినట్లు గనులు, భూగర్భ శాఖ జిల్లా ఉప సంచాలకులు సుబ్రహ్మణ్వేశ్వర రావు గురువారం ఓ ప్రకటనలో తెలిపారు. ఈ రేవుల్లో 6,01,646 టన్నుల ఇసుక అందుబాటులోకి రానుంది. సదరు రేవుల్లో తవ్వకాలు, రవాణా ప్రారంభించాలని జయప్రకాష్‌ వెంచర్స్‌ కంపెనీకి ఆదేశాలు జారీ చేశారు. హిందూపురం మండలం సంతేబిదనూరు, పామిడి మండలంలో వంకరాజు కాల్వ, తంబళ్లపల్లె, బెళుగుప్ప మండలంలో నర్సాపురం, కంబదూరు మండలంలో చెన్నంపల్లి, బ్రహ్మసముద్రం మండలంలో అజయ్యదొడ్డి, కణేకల్లు మండలంలో రచ్చుమర్రి, తాడిపత్రి మండలంలో ఆలూరు, వంగనూరు, పెద్దపప్పూరు మండలంలో ధర్మాపురం, యల్లనూరు మండలంలో చింతకాయమంద, చిలమకూరుల్లో రేవులకు అనుమతులు మంజూరు అయ్యాయి. ఇక్కడ ఇసుక అందుబాటులో ఉంటుందని, వినియోగదారులు సద్వినియోగం చేసుకోవాలని డీడీ కోరారు.