పరికరం లేదు.. నీడా కానరాదు..!

ఐదేళ్లుగా ఉపాధి కూలీలకు అందని గడ్డపారలు

సొంత డబ్బులతో కొనుగోలు చేస్తున్న వైనం

పెద్దపంజాణి మండలం చిన్నారికుంట చెరువులో ఫిష్‌పాండ్‌ పనిలో నిమగ్నమైన కూలీలు

ఈనాడు డిజిటల్‌, చిత్తూరు- న్యూస్‌టుడే, పెద్దపంజాణి: గ్రామాల్లో జాబ్‌ కార్డులున్న వ్యక్తులకు ఏడాదికి వంద పనిదినాలు కల్పించాలని ప్రభుత్వం లక్ష్యంగా నిర్దేశించింది. ఇదే సమయంలో వంద రోజులు పనిచేసే బృందాలకు గడ్డపార (గునపం) అందించాలి. పదును పెట్టేందుకు వారానికి రూ.10 చొప్పున నగదు జమ చేయాలి. ఐదేళ్లుగా గునపాలు సరఫరా చేయడంలేదు. ఈ విషయమై సిబ్బందిని ప్రశ్నిస్తే సమాధానం కరవవుతోంది. ప్రభుత్వం నుంచి వచ్చిన తర్వాతే ఇస్తామని చెబుతున్నారు. అధికారులను అడిగితే.. కూలి ఖర్చులో కలిపి ఈ మొత్తాన్ని అందిస్తున్నామని అంటున్నారు. దీంతో ఎక్కడ కూలి తక్కువ వస్తుందోననే ఉద్దేశంతో కూలీలే సొంతంగా వాటిని సమకూర్చుకుంటున్నారు. మరికొందరు అరిగిన గడ్డపారలతోనే పనులు చేస్తున్నారు.

సేద తీరాలంటే చెట్ల చెంతకు వెళ్లాల్సిందే

పని ప్రదేశంలో కూలీలు సేదతీరే ప్రాంతంలో కచ్చితంగా నీడను కల్పించాలని కేంద్రం నిర్దేశించింది. ప్రభుత్వం నుంచి టార్పాలిన్లు రాకపోవడంతో జిల్లావ్యాప్తంగా కూలీలు పని ముగిసిన తర్వాత ఎండలోనే కూర్చోవాల్సి వస్తోంది. సమీపంలో చెట్లు ఉంటే వాటి చెంత సేద తీరుతున్నారు. పనులు చేస్తున్న సందర్భంలో కూలీలకు గాయాలైతే ప్రథమ చికిత్స కిట్‌ కూడా అందుబాటులో ఉండటం లేదు.

సొంతంగా కొన్నా

ఉపాధి పనులకు అరిగిపోయిన గడ్డపార తీసుకెళ్లాలంటే ఇబ్బందిగా ఉంది. దీంతో సొంతంగా డబ్బులు వెచ్చించి గడ్డపార కొనుగోలు చేసి పనులు చేస్తున్నా. ప్రభుత్వం వెంటనే ఉపాధి కూలీలకు పరికరాలు, పని ప్రదేశంలో నీడ, మెడికల్‌ కిట్‌ అందుబాటులో ఉండేలా చర్యలు తీసుకోవాలి.  - వెంకట రమణ, ఉపాధి కూలీ, చిన్నారికుంట

జిల్లాలో జాబ్‌కార్డులున్న కుటుంబాలు : 1,50,682

ఏప్రిల్‌ చివరి నాటికి పనుల్లో పాల్గొన్నవి : 45,956

వీరికి కల్పించిన పనిదినాలు : 6,06,248

నిలువ నీడలేక చెట్టు కింద సేదతీరుతున్న కూలీలు