తిరుమలకు గంజాయి అక్రమ రవాణా దారుణం: భాజపా

భానుప్రకాశ్‌రెడ్డి

తిరుమల, న్యూస్‌టుడే: తులసీవనం లాంటి తిరుమలలో గంజాయి అక్రమ రవాణా, విక్రయాలు చేయడం వంటి సంఘటనలు భక్తుల మనోభావాలు దెబ్బతీస్తున్నాయని భాజపా రాష్ట్ర అధికార ప్రతినిధి భానుప్రకాశ్‌రెడ్డి ఆరోపించారు. ఆదివారం ఉదయం వీఐపీ బ్రేక్‌ దర్శన సమయంలో శ్రీవారి మూలమూర్తిని ఆయన దర్శించుకున్నారు. ఆలయం వెలుపల మీడియాతో మాట్లాడుతూ.. తిరుమలలో మూడంచెలు, నాలుగంచెల భద్రత కల్పిస్తున్నామని తితిదే చెబుతున్నా గంజాయి ఏవిధంగా పట్టుబడుతుందని ప్రశ్నించారు. పోలీసు శాఖ, విజిలెన్స్‌.. ఇతర విభాగాలు ఉన్నా తిరుమలకు గంజాయి సరఫరా వెనుక కీలకమైన వ్యక్తులు ఉన్నారని ఆరోపించారు. దీనిపై సమగ్ర విచారణ జరిపి నిందితులను, వారి వెనుక ఉన్న కీలక వ్యక్తులపై కఠిన చర్యలు తీసుకోవాలని డిమాండు చేశారు. ఇప్పటికైనా తితిదే యాజమాన్యం దీనిపై దృష్టి సారించాలని విజ్ఞప్తి చేశారు.