తెదేపా నాయకులపై వైకాపా దాడి

ఇరు వర్గాలపై కేసు నమోదు

పోలీసులతో మాట్లాడుతున్న తెదేపా నాయకులు

వి.కోట, న్యూస్‌టుడే: తెదేపా నాయకులపై వైకాపా నాయకులు దాడి చేసి గాయపరిచిన ఘటన మండలంలో చోటుచేసుకుంది. సీఐ ప్రసాద్‌బాబు కథనం మేరకు.. స్థానిక భారత్‌ థియేటర్‌ వద్ద ఉన్న ఓ స్థలం విషయమై తమకు మూడు రోజుల క్రింద కోర్టులో అనుకూలంగా తీర్పు వచ్చిందని వైకాపా రాష్ట్ర కార్యదర్శి పీఎన్‌ నాగరాజు వర్గం అక్కడి దుకాణాలు తొలగించేందుకు మంగళవారం రాత్రి వెళ్లింది. మరోవైపు ఈ స్థలం తమకు చెందిందని తెదేపా సీనియర్‌ నేత ఎక్బాల్‌ వర్గం అడ్డుపడింది. దీంతో ఇరువర్గాల వారు పెద్దఎత్తున అక్కడికి చేరుకోగా ఘర్షణ చోటుచేసుకుంది.

గాయపడ్డ ఎక్బాల్‌

ఈ దాడుల్లో ఎక్బాల్‌, అతని కుమారుడు తీవ్రంగా గాయపడగా చికిత్స నిమిత్తం స్థానిక ప్రభుత్వ ఆసుపత్రికి తరలించారు. పీఎన్‌ నాగరాజు వర్గం తమపై దాడికి పాల్పడి గాయపరిచారని, తమకు న్యాయం చేయాలని స్థానిక ప్రభుత్వ ఆసుపత్రి వద్ద జాతీయ రహదారిపై ఎక్బాల్‌ వర్గం ధర్నా చేసింది. దీంతో రహదారిపై పెద్దఎత్తున ట్రాఫిక్‌ స్తంభించింది. విషయం తెలుసుకొన్న పోలీసులు సంఘటనా స్థలానికి చేరుకొని వారికి నచ్చచెప్పి ధర్నా విరమింపజేశారు. ఇరువర్గాల వారు పోలీసులకు ఫిర్యాదు చేయగా పీఎన్‌ నాగరాజు, ఎక్బాల్‌ వర్గాలపై మంగళవారం అర్ధరాత్రి దాటాక కేసులు నమోదు చేసినట్లు పోలీసులు తెలిపారు.