ఆంధ్రా అబ్బాయి.. అమెరికా అమ్మాయి

న్యూస్‌టుడే, దేవరపల్లి: తూర్పుగోదావరి జిల్లాకు చెందిన అబ్బాయికి, అమెరికా అమ్మాయికి వివాహమైంది. వివరాల్లోకి వెళ్తే... దేవరపల్లి మండలం ధూమంతునిగూడేనికి చెందిన ధూమంతరావు చలపతి అచ్యుతరామారావు, లక్ష్మి దంపతులు 22 ఏళ్ల క్రితం ఉద్యోగరీత్యా అమెరికాలో స్థిరపడ్డారు. వీరికి ఇద్దరు కుమారులు కాగా పెద్దకుమారుడు ఆదిత్య భౌతికశాస్త్రంలో పీహెచ్‌డీ చేసి, అక్కడే శాస్త్రవేత్తగా ఉద్యోగం చేస్తున్నారు. అమెరికాకు చెందిన అలాన్‌ హార్ట్సో-జానస్‌ హార్ట్సోల కుమార్తె ఎమిలీకి, ఆదిత్యకు గురువారం రాత్రి దేవరపల్లిలో హిందూ సంప్రదాయం ప్రకారం వివాహమైంది. శుక్రవారం ఉదయం రిసెప్షన్‌ జరగ్గా గ్రామస్థులు అందరూ వచ్చి ఆశీర్వదించారు.