Cyber Crime: వర్కు ఫ్రమ్‌ హోమ్‌ పేరిట రూ.4 లక్షలు దోచేశారు!

రాజమహేంద్రవరం నేరవార్తలు: ఇంటి వద్దనే ఉంటూ ఆన్‌లైన్‌లో పనిచేసి నగదు సంపాదించవచ్చునని చరవాణికి వచ్చిన సందేశానికి స్పందిస్తే రూ.లక్షలు దోచుకున్నారంటూ బాధితురాలు పోలీసులను ఆశ్రయించిన ఘటన రాజమహేంద్రవరం మూడో పట్టణ స్టేషన్‌ పరిధిలో చోటు చేసుకుంది. సీఐ వీరయ్యగౌడ్‌ వివరాల మేరకు.. సుభాష్‌నగర్‌కు చెందిన కె.రవిప్రసాద్‌ నగరంలోని ఓ ప్రైవేటు సంస్థలో పనిచేస్తున్నారు. ఇతని భార్య దివ్యసురేఖ గృహిణి. గత నెల 15న తన ఇన్‌స్టాగ్రామ్‌కు.. ఇంటి వద్దనే ఉంటూ ఆన్‌లైన్‌లో నగదు సంపాదించవచ్చని ఓ సందేశం వచ్చింది. లింక్‌ క్లిక్‌ చేయగా టెలిగ్రామ్‌లో మరో లింక్‌ తెరుచుకుంది. ఓ అయిదు దఫాలుగా నగదును చెల్లించి టాస్కులు చేయగా రెట్టింపు వచ్చింది. అనంతరం మీరు చెల్లిస్తున్న మొత్తానికి రెట్టింపు చెల్లిస్తేనే మీ నగదు తిరిగి వస్తుందని సందేశాలు రావడంతో పలు దఫాలుగా రూ.4.08 లక్షలు వరకూ ఆన్‌లైన్‌లో ఆమె చెల్లించారు. తరువాత కూడా మరో రూ.5 లక్షలు చెల్లించాలని సందేశం రావడంతో మోసపోయానని గ్రహించి బాధితురాలు పోలీసులను ఆశ్రయించారు.