రోడ్డు ప్రమాదంలో కుమార్తె మృతి

తండ్రికి తీవ్ర గాయాలు

నల్లజర్ల, న్యూస్‌టుడే: ద్విచక్ర వాహనం అదుపుతప్పి విభాగినిని ఢీకొన్న ప్రమాదంలో కోమటి హర్షిణి (8) మృతిచెందగా తండ్రి సురేష్‌ తీవ్రగాయాలతో బయటపడ్డారు. జాతీయ రహదారిపై దూబచర్ల వద్ద శనివారం జరిగిన ఘటనపై నల్లజర్ల పోలీసులు తెలిపిన వివరాలు.. కొయ్యలగూడెం మండలం కుంతలగూడెం గ్రామానికి చెందిన కోమటి సురేష్‌ బతుకుదెరువు కోసం రెండేళ్ల క్రితం నల్లజర్ల మండలం అయ్యవరం గ్రామానికి చెందిన అత్తమామలు గుడిసె సిద్దమ్మ, చిట్టియ్య ఇంటికి వచ్చేశారు. ఇక్కడే ఉంటూ వ్యవసాయ కూలీగా పనులు చేస్తున్నారు. అతనికి భార్య కృష్ణవేణి, పెద్దకుమార్తె ఇందుమతి, నాలుగో తరగతి చదువుతున్న చిన్నకుమార్తె హర్షిణి.. వీళ్లే లోకం. దేవరపల్లి మండలం చిన్నాయగూడెంలో బంధువుల ఇంట శుభకార్యానికి వెళ్లేందుకు ద్విచక్ర వాహనంపై చిన్న కుమార్తె హర్షిణితో వెళ్లి తిరిగి వస్తూ ప్రమాదానికి గురయ్యారు. ద్విచక్ర వాహనంపై నుంచి రహదారిపై పడిపోయిన హర్షిణి తలకు బలమైన గాయం కావడంతో అంబులెన్స్‌లో నల్లజర్ల ప్రభుత్వాసుపత్రికి తరలిస్తుండగా మార్గంమధ్యలో ప్రాణాలు కోల్పోయింది. తీవ్రగాయాలైన సురేష్‌ పరిస్థితి విషమంగా మారడంతో మెరుగైన వైద్యం కోసం ఏలూరులోని ఆశ్రం ఆసుపత్రికి తరలించారు. బాలిక మృతదేహాన్ని పోస్ట్‌మార్టం నిమిత్తం తాడేపల్లిగూడెం ప్రభుత్వాసుపత్రికి తరలించి కేసు నమోదుచేసినట్టు ఎస్సై వెంకటసురేష్‌ తెలిపారు.