టీహబ్‌కు తరలొస్తున్న ఔత్సాహికులు

రాయదుర్గం, న్యూస్‌టుడే: రాష్ట్ర ముఖ్యమంత్రి కె.చంద్రశేఖర్‌రావు మంగళవారం ప్రతిష్ఠాత్మకంగా ప్రారంభించిన రాయదుర్గం హెచ్‌కేసీ(హైదరాబాద్‌ నాలెడ్జ్‌ సిటీ)లోని సాంకేతిక ఆవిష్కరణల కేంద్రం టీ-హబ్‌-2కు సందర్శకుల తాకిడి మొదలైంది. ఈ కేంద్రానికి విశేష స్పందన లభిస్తోంది. ఆరంభమైన రెండో రోజు బుధవారం దీన్ని సందర్శించేందుకు, అందులో కార్యకలాపాలు ప్రారంభించి తమ అదృష్టాన్ని పరీక్షించుకొనేందుకు మరికొంత మంది వివిధ ప్రాంతాల నుంచి తరలివచ్చారు. దాంతో ఈ కేంద్రం వద్ద సందడి నెలకొంది. బుధవారం ఉదయం నుంచే సందర్శకులు రావడం ప్రారంభించారు. ప్రస్తుతం ట్రిపుల్‌ ఐటీలో మొదటి దశ టీ-హబ్‌లో అంకురాలను కొత్త భవనంలోకి తరలించడంలో సిబ్బంది నిమగ్నమయ్యారు. సరికొత్త నిర్మాణాకృతితో అలరిస్తున్న టి-హబ్‌ ప్రారంభంతో రాయదుర్గం హెచ్‌కేసీ సాంకేతిక పర్యాటక కేంద్రంగా మారింది. భవనం వద్ద నిలబడి పలువురు సెల్ఫీలు తీసుకొని మురిసిపోయారు. పలువురు ఔత్సాహిక యువత టీహబ్‌కు వచ్చి అక్కడ అంకురాల ఏర్పాటుపై ఆరా తీశారు. కేంద్రంలోని వసతులు, కార్యాలయం ఏర్పాటు నియమ నిబంధనలను తెలుసుకున్నారు. నగరంతో పాటు రాష్ట్రంలోని ఇతర జిల్ల్లాలు, ఏపీలోని విశాఖపట్నం, విజయవాడ తదితర ప్రాంతాల నుంచీ వచ్చారు.