రైల్వే ఆధ్యాత్మిక యాత్ర విజయవంతం

యాత్రికులతో ద.మ.రైల్వే జీఎం ఏకే జైన్‌

ఈనాడు, హైదరాబాద్‌, రెజిమెంటల్‌బజార్‌, న్యూస్‌టుడే: పూరీ.. కాశీ.. అయోధ్య ఇలా 9 రోజుల పాటు సాగే ‘భారత్‌ గౌరవ్‌’ ఆధ్యాత్మిక రైలు యాత్రకు ఫుల్‌ డిమాండ్‌ ఏర్పడింది. ఈ నెల 18న మొట్టమొదటిసారి నగరం నుంచి పట్టాలెక్కిన ఈ రైలు ఆదివారం నగరానికి చేరుకుంది. ఏప్రిల్‌ 18న మొదలయ్యే రెండో యాత్రకు టికెట్లు బుకింగ్‌ ప్రారంభించిన 4 రోజులకే అయిపోయాయి. దీంతో ఏప్రిల్‌ 29న మరో యాత్ర చేపట్టారు. ఆ యాత్రకూ టికెట్లు 5 రోజుల్లోనే అయిపోయాయని ఐఆర్‌సీటీసీ జాయింట్‌ జనరల్‌ మేనేజర్‌ కిషోర్‌ చెప్పారు. మే 13న ప్రారంభమయ్యే యాత్రకు బుకింగ్‌ తెరిచామన్నారు. ప్రతి నెలా ఒకేసారి ఈ యాత్ర ఉంటుందని ముందుగా ప్రకటించినా.. ఆధ్యాత్మిక యాత్రికుల నుంచి డిమాండ్‌ పెరగడంతో నెలలో రెండు యాత్రలు నిర్వహిస్తున్నామని ద.మ. రైల్వే ముఖ్య ప్రజాసంబంధాల అధికారి సీహెచ్‌. రాకేష్‌ తెలిపారు.