రాముడి క్షేత్రాలకు ప్రత్యేక బస్సులు

కరీంనగర్‌ రవాణావిభాగం, న్యూస్‌టుడే: శ్రీ సీతారాముల కల్యాణ మహోత్సవానికి ఒక వైపు ఆలయాలు ముస్తాబవుతుండగా, మరోవైపు ఆర్టీసీ బుధవారం ఆలయాలకు ప్రత్యేక బస్సులు నడపాలని నిర్ణయించింది. భద్రాచలం, వేములవాడ, ఇల్లందకుంటలో జరిగే రాములోరి కల్యాణ వేడుకలకు అదనపు బస్సులు తిప్పనున్నారు. వేములవాడకు రీజియన్‌లోని పలు డిపోల నుంచి 160 అదనపు బస్సులు నడపనున్నారు. హుస్నాబాద్‌, హుజూరాబాద్‌, జగిత్యాల, కరీంనగర్‌, కోరుట్ల, మెట్‌పల్లి, రాజన్న సిరిసిల్ల, జేబీఎస్‌, వరంగల్‌ నుంచి ప్రత్యేక బస్సులు నడపాలని అధికారులు నిర్ణయించారు.  గోదావరిఖని, హుస్నాబాద్‌, కరీంనగర్‌-2, కోరుట్ల, మెట్‌పల్లి డిపోల నుంచి భద్రాచలానికి పది బస్సులు తిప్పనున్నారు. జమ్మికుంట మండలంలోని ఇల్లందకుంట శ్రీసీతా రామాలయానికి హుజూరాబాద్‌ డిపో నుంచి అదనపు బస్సులు నడపనున్నారు. భక్తులు ఈ అవకాశాన్ని సద్వినియోగం చేసుకోవాలని కరీంనగర్‌ అసిస్టెంట్‌ ట్రాఫిక్‌ మేనేజర్‌ రజనీకృష్ణ సూచించారు. భక్తులకు ఇబ్బందులు కలగకుండా చూస్తామన్నారు.