Gali Janardhan Reddy: ‘పులి ఆకలితో ఉంది.. వేటాడే సమయంలో ఆ హద్దులేవీ ఉండవ్‌’

గాలి జనార్దన్‌రెడ్డి, సోమశేఖర్‌రెడ్డిలను సన్మానిస్తున్న కార్పొరేటర్‌ గోవిందరాజులు తదితరులు

బళ్లారి, న్యూస్‌టుడే : ‘పులి ఆకలితో ఉంది.. వేటాడే సమయంలో ఆ పులికి కాంగ్రెస్‌, భాజపా అంటూ హద్దులేవీ ఉండవు. వేటాడడం మాత్రమే తెలుసు’ అని మాజీ మంత్రి గాలి జనార్దన్‌రెడ్డి చేసిన వ్యాఖ్యలు రాజకీయ వర్గాల్లో చర్చకు కారణమైంది. మరోసారి రాజకీయాల్లోకి అడుగు పెడుతున్నట్లు ఆయన పరోక్షంగా ప్రకటించారు. బళ్లారిలోని 25వ వార్డు కార్పొరేటర్‌ గోవిందరాజులు ఇంటి వద్ద శుక్రవారం రాత్రి ఏర్పాటు చేసిన సన్మాన కార్యక్రమంలో ఎమ్మెల్యే సోమశేఖర్‌రెడ్డితో కలిసి ఆయన పాల్గొన్నారు. ఈ సందర్భంగా ఆ ఇద్దరినీ సన్మానించారు. అనంతరం గాలి జనార్దన్‌ మాట్లాడుతూ.. కార్యక్రమానికి వస్తున్న సమయంలో ఓ బాలుడు పులి వేషంలో దుస్తులు ధ]రించి.. నన్ను చూసి పులి వచ్చిందని అభిమానంతో పిలిచాడని.. పులి వేటాడడానికి సిద్ధమైందని వ్యాఖ్యానించారు. ‘రాజకీయాలకు దూరమై పుష్కర కాలమైంది. ఎందరు విమర్శిస్తున్నా. మౌనంగా ఉంటున్నా. బెంగళూరులో విలాసంగా జీవించే అవకాశం ఉన్నా.. బళ్లారి నాకుముఖ్యం. ఊపిరి ఉన్నంత వరకూ ఇక్కడే ఉండాలని కోరుకుంటున్నా. న్యాయస్థానంలో న్యాయం లభిస్తుందనే నమ్మకం ఉంది’ అని వివరించారు. సమావేశంలో బుడా అధ్యక్షుడు మారుతీప్రసాద్‌, పలువురు కార్పొరేటర్లు, కార్యకర్తలు పాల్గొన్నారు.