కుటుంబం.. మట్టిపాలు

లారీ కింద ఐదుగురి విషాదాంతం

బాగలకోటె, న్యూస్‌టుడే : మధ్య కర్ణాటలోని బీళగి తాలూకా యత్నట్టి క్రాస్‌ సమీపంలో ఆదివారం రాత్రి సంభవించిన రోడ్డుప్రమాదంలో ఐదుగురు మరణించారు. వీరంతా ఒకే కుటుంబానికి చెందిన వారు. పొలంలో పని చేసి తమ స్వగ్రామానికి వెళ్లేందుకు వాహనం కోసం వేచి చూస్తూ రోడ్డు పక్కనే నిల్చున్నారు. మట్టి లోడ్‌తో వెళ్తున్న లారీ వేగంగా వచ్చి వారిపై బోల్తా పడింది. మట్టి కింద చిక్కుకుని వారంతా అక్కడికక్కడే మృతి చెందారు. ప్రమాదానికి కారకుడైన డ్రైవరు లారీని వదిలి పరారయ్యాడు. స్థానికుల ఫిర్యాదుతో పోలీసులు, అగ్నిమాపకదళ సిబ్బంది మట్టిలో చిక్కుకున్న మృతదేహాలను బయటకు తీశారు. మరికాసేపట్లో ఇంటికి చేరిపోయే వారిని లారీ బలిగొందని కుటుంబ సభ్యులు కన్నీరుమున్నీరయ్యారు. మృతులను యంకప్ప శివప్ప తోలమట్టి (72), అతడి భార్య యల్లవ్వ (66), కుమారుడు పుండలీక (40), కుమార్తె నాగవ్వ (45), యంకప్ప అల్లుడు అశోక నింగప్ప బమ్మన్నవర (48)గా గుర్తించారు. ప్రభుత్వ ఆసుపత్రిలో శవ పరీక్షలు నిర్వహించి, వారి బంధువులకు మృతదేహాలను సోమవారం అప్పగించారు. బీళగి గ్రామీణ ఠాణా పోలీసులు దర్యాప్తు చేపట్టారు.