కొల్లేరుగా నామకరణం చేయరూ!

కైకలూరు: నూతన జిల్లాల విభజనలో భాగంగా ఏలూరు కేంద్రంగా ఏర్పాటయ్యే జిల్లాకు కొల్లేరుగా నామకరణం చేయాలని కైకలూరు అఖిలపక్ష నాయకులు డిమాండ్‌ చేశారు. దీనిపై ఉన్నతాధికారులను కలిసి త్వరలోనే వినతిపత్రం అందించనున్నట్లు పేర్కొన్నారు. ఈ మేరకు స్థానిక పాత కోర్టు ప్రాంగణంలో గురువారం సమావేశం ఏర్పాటు చేశారు. కైకలూరు నియోజకవర్గాన్ని ఏలూరులో కలపడంపై హర్షం వ్యక్తం చేశారు. కార్యక్రమంలో భాజపా నేత కీర్తి వెంకట రాంప్రసాద్‌, జాతీయ బీసీ సంక్షేమశాఖ రాష్ట్ర కార్యనిర్వహణ కార్యదర్శి గంగునేని వరప్రసాద్‌, జేఎపీ ఛైర్మన్‌ రుద్రపాక రత్నారావు, బలే చిరంజీవి, బొల్లా శ్యామలరావు తదితరులు పాల్గొన్నారు.