వసతి గృహంలో షార్ట్‌ఫిలిం చిత్రీకరణపై ఘర్షణ

లింగాల, న్యూస్‌టుడే : మండల కేంద్రంలోని ఎస్టీ బాలుర వసతిగృహంలో సోమవారం రాత్రి కొందరు బయటి వ్యక్తులు చొరబడి షార్ట్‌ఫిలిం చిత్రీకరించడంపై ఘర్షణ చోటు చేసుకొంది. పాత ఠాణాలో హాస్టల్‌ను నిర్వహిస్తున్నారు. సోమవారం రాత్రి సుమారు 11 గంటల ప్రాంతంలో గుర్తు తెలియని వ్యక్తులు అనుమతి లేకుండా వసతి గృహంలోకి చొరబడి పాత లాకప్‌ గదిలో సన్నివేశాలు చిత్రీకరించారు. 10వ తరగతి పరీక్ష రాసే విద్యార్థులు ఇబ్బంది పడుతున్నారని చిత్రీకరణను అడ్డుకోబోయిన హాస్టల్‌ వర్కర్‌పై షార్ట్‌ ఫిలింకు సంబంధించిన వ్యక్తులు దాడి చేశారు. వర్కర్‌ స్థానిక పీహెచ్‌సీలో చికిత్స పొందుతున్నారు. వసతి గృహంలో రాత్రిపూట రక్షణ కొరవడిందని గ్రామస్థులు ఆగ్రహం వ్యక్తం చేశారు. ఘటనా సమయంలో వార్డెన్‌ స్థానికంగా లేరు. ఈ వ్యవహారంపై వార్డెన్‌ తిరుపతయ్యను వివరణ కోరగా హాస్టల్‌లో చోటుచేసుకొన్న వ్యవహారం వాస్తవమేనన్నారు. ఉన్నతాధికారుల దృష్టికి తీసుకెళ్తానన్నారు. ఫిర్యాదు అందలేదని పోలీసులు పేర్కొన్నారు.