గద్వాలలో భారీ చోరీ

తెరిచి ఉన్న బీరువా

గద్వాల అర్బన్‌, న్యూస్‌టుడే: గద్వాలలో చోరీల పరంపర కొనసాగుతోంది. తమ పోలీసు సిబ్బంది కట్టుదిట్టంగా విధులు నిర్వహిస్తున్నారని ఉన్నతాధికారులు చెబుతున్నప్పటికీ జిల్లాలో ప్రధాన కాలనీలో భారీ స్థాయిలో చోరీ చేసుకోవడం పోలీసు శాఖకు నిజంగా తలనొప్పే. ఇటీవల ఓ వివాహ వేడుకలో 30 తులాల బంగారు ఆభరణాల చోరీ సంఘటన మరువక ముందే గురువారం మరో చోరీ చేసుకోవడంతో గద్వాల ప్రజలు ఆందోళనకు గురవుతున్నారు. బాధితుల కథనం మేరకు.. గద్వాలలోని లింగంబాగ్‌ కాలనీకి చెందిన సాయి పల్లవి ట్రేడర్స్‌ యజమాని ఇనుగూరు వెంకటేశ్వర్లు ఈ నెల 26న తన 11 రోజుల మనవడిని చూసేందుకు కుటుంబ సభ్యులతో సహా బెంగళూరు వెళ్లాడు. వ్యాపార నిమిత్తం వెంకటేశ్వర్లు కొడుకు రాజేశ్‌ గురువారం గద్వాలలోని తన ఇంటికి తెల్లవారు జామున 5 గంటల సమయంలో చేరుకున్నాడు. ఇంటికి వేసిన తాళం లేకుండా తలుపులు మూసి ఉండటంతో ఆందోళనకు గురై లోపలికి వెళ్లి బీరువాను చూడగా బీరువా తెరిచి ఉంది. వస్తువులన్నీ చిందరవందరగా పడి ఉన్నాయి. బీరువాలో పెట్టిన రూ.12.50 లక్షల నగదు, 42 తులాల బంగారు ఆభరణాలతో పాటు రూ.2 లక్షల విలువ గల ఓ సంస్థ బాండ్లు, 3 పాస్ట్‌పోర్ట్‌లు చోరీకి గురైనట్టు గుర్తించి పోలీసులకు సమాచారం ఇచ్చారు. సంఘటన స్థలానికి గద్వాల పట్టణ పోలీసులు, డాగ్‌, క్లూస్‌ టీం చేరుకుని పరిశీలించారు. బాధితుడు వెంకటేశ్వర్లు ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.