పీడీ ప్రతిపాదన ఏదీ?

జైలులోనే హత్య కేసు నిందితులు
న్యూస్‌టుడే, నిజామాబాద్‌ నేరవార్తలు

హత్య కేసులో నిందితుడు, రౌడీషీటర్‌ ఆరిఫ్‌పై పీడీ ప్రతిపాదన అటకెక్కింది. నిందితులపై పీడీ అస్త్రం ప్రయోగిస్తామని పోలీసులు ప్రకటించి నెలరోజులు గడిచింది. ఆ దిశగా ఇప్పటివరకు చర్యలేవీ మొదలుపెట్టలేదు. ప్రస్తుతం నిజామాబాద్‌ కారాగారంలోనే ఆరిఫ్‌తో పాటు మరికొంత మంది నిందితులు రిమాండు ఖైదీలుగా ఉన్నారు. వీరంతా బెయిలు ప్రయత్నాల్లో ఉన్నారు.

* పీడీఎస్‌ దందా నడిపే వారి నుంచి మామూళ్లు తీసుకొనే క్రమంలో ఇద్దరు రౌడీషీటర్లు ఇబ్రహీం చావుస్‌, ఆరిఫ్‌ మధ్య విభేదాలు ఏర్పడ్డాయి. ఇదే కారణంతో ఇబ్రహీంను గత నెలలో ఆరిఫ్‌ హతమార్చాడు. ఆయనపై గతంలోనూ అనేక కేసులు ఉన్నాయి. వీటన్నింటి దృష్ట్యా ఆరిఫ్‌ను కట్టడి చేసేలా చర్యలు చేపట్టాల్సి అవసరం ఉంది.

* స్థానికుల ఆందోళన..  ఒక రౌడీషీటర్‌ హత్యకు గురికాగా.. మరో రౌడీషీటర్‌ జైలులో ఉన్నాడు. నెల రోజులుగా బోధన్‌ రోడ్డు, మాలపల్లి, అర్సపల్లి శివారు ప్రాంతాల్లో పరిస్థితులు ప్రశాంతంగా ఉన్నాయి. పెద్దగా గొడవలు జరిగిన దాఖలాలు లేవు. తిరిగి ఆరిఫ్‌ ముఠా బయటకు వస్తే పరిస్థితులు ఎప్పటిలాగా మారే ప్రమాదం ఉందని స్థానికులు ఆందోళన చెందుతున్నారు.