రామచంద్ర హోటల్స్‌ అధినేత కన్నుమూత

రామచంద్రరావు (పాతచిత్రం)

గాజువాక, న్యూస్‌టుడే : గాజువాక లక్ష్మి, లక్ష్మీకాంత్‌ సినీకాంప్లెక్స్‌ థియేటర్స్‌, గ్రూప్‌ ఆఫ్‌ రామచంద్ర హోటల్స్‌ అధినేత, సేవా కార్యకర్త గంటా రామచంద్రరావు (81) ఆదివారం కన్నుమూశారు. వయసురీత్యా కొద్దిరోజులుగా అనారోగ్యంతో బాధపడుతున్న ఆయన సాయంత్రం గాజువాకలోని తన నివాసంలో తుదిశ్వాస విడిచారు. ఆయనకు భార్య, ఇద్దరు కుమారులు, ఒక కుమార్తె ఉన్నారు. సేవా కార్యక్రమాల్లో భాగంగా అయిదేళ్ల క్రితం గాజువాక జెడ్పీ ఉన్నత పాఠశాలలో రూ.14 లక్షలతో అదనపు పాఠశాల భవనాన్ని నిర్మించారు. కూర్మన్నపాలెంలో కొన్నాళ్లపాటు వృద్ధాశ్రమాన్ని నిర్వహించి, ఆ తర్వాత వివిధ కారణాలతో మూసివేశారు. ఏలూరులో రామచంద్ర ఇంజినీరింగ్‌ కళాశాలను నిర్వహిస్తూ ఎందరికో ఉన్నత విద్యా అవకాశాలు కల్పించారని కుటుంబ సభ్యులు తెలిపారు. సోమవారం గాజువాక శ్మశానవాటికలో రామచంద్రరావు అంత్యక్రియలు నిర్వహిస్తున్నట్లు కుటుంబీకులు పేర్కొన్నారు.