‘బోయ వాల్మీకులను ఎస్టీల్లో చేర్చొద్దు’

నినాదాలు చేస్తున్న గిరిజనులు

మాడుగుల, న్యూస్‌టుడే: రాష్ట్రంలో 40 లక్షలకు పైబడి ఉన్న బోయ వాల్మీకి, బెంతు ఒరియా కులాలను ఎస్టీల్లో చేర్చాలని ప్రభుత్వం చేస్తున్న ప్రయత్నాలు సరికాదని గిరిజన సంఘం ఐదో షెడ్యూల్డ్‌ సాధన కమిటీ జిల్లా ప్రధాన కార్యదర్శి ఇరట నరసింహమూర్తి అభ్యంతరం వ్యక్తం చేశారు. బుధవారం ఎం.గదబూరులో గిరిజనులతో కలిసి నిరసన తెలిపారు. నాన్‌ షెడ్యూల్డ్‌ గిరిజన గ్రామాలను ఐదో షెడ్యూల్డ్లో చేరుస్తామని చెప్పి ఆ విషయాన్ని పట్టించుకోలేదన్నారు. ఎన్నో ఏళ్లుగా ఎటువంటి ప్రభుత్వ పథకాలకు నోచుకోని ఆదివాసీలకు అన్యాయం చేసే చర్యలు విరమించుకోవాలని నినాదాలు చేశారు.  ఎర్రయ్యమ్మ, సోమునాయుడు, ఆదినారాయణ, భూలోకమ్మ, దేముడమ్మ తదితరులు పాల్గొన్నారు.