బీసీల రక్షణకు ప్రత్యేక చట్టం : శ్రీభరత్‌

గాజువాక, న్యూస్‌టుడే : తెదేపా కూటమి ప్రభుత్వంలో బీసీల రక్షణకు ప్రత్యేక చట్టం తీసుకొస్తామని, గవర సామాజిక వర్గానికి పెద్దపీట వేసిన ఘనత తెదేపాకే దక్కుతుందని విశాఖ ఎంపీ అభ్యర్థి శ్రీభరత్‌ అన్నారు. బుధవారం 70వ వార్డు శ్రామికనగర్‌లో గాజువాక పట్టణ గౌరీ సంఘాల ఆత్మీయ సమావేశం ఏర్పాటు చేశారు. ముఖ్యఅతిథిగా హాజరైన శ్రీభరత్‌ మాట్లాడుతూ... వైకాపా అయిదేళ్ల పాలనలో గవర సామాజిక వర్గం మోసానికి గురైందని, ఈ ఎన్నికల్లో వైకాపాకు గుణపాఠం చెప్పాలని పిలుపునిచ్చారు. గాజువాక ఎమ్మెల్యే అభ్యర్థి పల్లా శ్రీనివాసరావు మాట్లాడుతూ... భావితరాల భవిష్యత్తుకు ప్రతి ఒక్కరూ తెదేపా కూటమికి మద్దతు పలకాలన్నారు. గవర సంఘం నాయకుడు కేవీఎస్‌ శంకరరావు అధ్యక్షత వహించారు. సభ్యులు రమణ, నాయుడు, పెంటారావు, వెంకట అప్పారావు తదితరులు పాల్గొన్నారు.