ఉద్యోగం వచ్చేంత వరకు రూ. 3 వేల నిరుద్యోగ భృతి

బాటజంగాలపాలెంలో మాట్లాడుతున్న జనసేన అభ్యర్థి పంచకర్ల రమేశ్‌బాబు

సబ్బవరం, న్యూస్‌టుడే: పెందుర్తి నియోజకవర్గం కూటమి అభ్యర్థి పంచకర్ల రమేశ్‌బాబుకు సబ్బవరం మండలం ప్రజలు గురువారం బ్రహ్మరథం పట్టారు. నారపాడు, నల్లరేగులపాలెం, బల్జిపాలెం, బాటజంగాలపాలెం, గణపతినగర్‌, అసకపల్లి, ఎరుకునాయుడుపాలెం, పైడివాడ అగ్రహారం గ్రామాల్లో సుడిగాలి ప్రచారం నిర్వహించారు. ఈ సందర్భంగా ఆయన మాట్లాడుతూ పంచాయతీల్లో డబ్బులు లాగేసుకున్న జగన్‌కు తగిన బుద్ధి చెప్పాలన్నారు. కూటమి అధికారంలోకి రాగానే 19 నుంచి 59 ఏళ్లలోపు మహిళల ఖాతాల్లో నెలకు రూ.1500 జమ, ఉచితంగా 3 గ్యాస్‌ సిలెండర్లు, పింఛను నెలకు రూ.4 వేలు ఇస్తామన్నారు. రైతులకు ఏడాదికి రూ.20 వేలు ఆర్థిక సాయం అందజేస్తామన్నారు. యువతకు 20 లక్షల ఉద్యోగాలు ఇస్తామని లేకుంటే ఉద్యోగం వచ్చేవరకు నెలకు రూ.3వేలు నిరుద్యోగ భృతి చెల్లిస్తామన్నారు. కూటమి నేతలు గండి వంశీదీప్‌, పడాల వెంకటరమణ, మామిడి శంకర్రావు, పి.శ్రీను, బొబ్బరి కన్నారావు, అక్కిరెడ్డి దుర్గినాయుడు తదితరులు పాల్గొన్నారు.

పంచకర్లకు పాస్టర్ల మద్దతు: సబ్బవరం మండలంలోని వివిధ చర్చిల పాస్టర్లు వరప్రసాద్‌, జి.జోసెఫ్‌రాజు, పి.మనోహర్‌, వి.చేలాజ్‌, కె.మనోహర్‌ తదితర 30 మంది పంచకర్ల రమేశ్‌బాబుకు ఆయన సోదరుడు వెంకటేశ్వరరావు సమక్షంలో మద్దతు తెలిపారు. అనకాపల్లి భాజపా ఎంపీ అభ్యర్థి సీఎం రమేశ్‌కు కూడా పూర్తి మద్దతు ప్రకటిస్తున్నట్లు ప్రకటించారు. సాలాపు వెంకటటేశ్వరరావు, బంతికోళ్ల పద్మ, ఇందల వెంకటరమణ, మిడతాడ మహాలక్ష్మినాయుడు, కేవీ రమణ, గొర్లి ప్రసాద్‌, జెట్టి ప్రసాద్‌, తీడ రవి, కర్రి కనకరాజు తదితరులు పాల్గొన్నారు.